《旅行的意義》- 有冇人明獨旅的風景

三宅唱的《旅行的意義》(Two Seasons, Two Strangers) 有人窒悶聲連連唔知想點，亦應有人一看就明，正如小弟。 

講真這套該叫「獨旅的意義」：沈恩敬、河合優實、高田萬作做的就係獨自旅行，相對旅行，更多人問係「為什麼你只自己一個去旅行？ 」「一個人旅行唔寂寞嗎？ 」電影係有去答，卻除了沈明確說她韓國人到日本只為工作，異鄉人身處異地亦就是旅行；河合高田理由更唔明顯，由你自己猜度他倆在逃避 - 就係與其直接窒其實點解關你撚事，還不如用例子答你獨遊可做甚麼：河合由無人的博物館經野路走到只有高田的海邊，高田嫌原坐著的沙灘太多人轉坐至此 - 幹的就係找無人知曉風景，縱使到場難免多出一個，亦最好你係志同道合。 

 

你問三宅為何拍這看來簡單無奇題目，他或解看似簡單但就大把唔明，所以佢咁問有冇人明：如沈編劇河合高田演的戲中戲，有人如現實般窒話看唔明，佐野史郎飾的教授卻話表現得很叫人貼近很性感。教授逝後其孖生弟硬送給沈一部相機，像說若然做事要計較得著，就如問獨旅能得到甚麼，一個顯著得到的係你記錄到唯你自己發掘的風景。 

 

你或唔識趣堅持問點解要獨旅？電影後部答人類看似群居卻又時而孤島城堡，堤真一的旅館老闆常多嘢講卻又時嫌沈太多嗲，關鍵係沈似問到他痛處；沈思索劇本時覺堤真的點子周圍的事物未可取，唯她單獨一人位於同一旅館時，突然靈感湧現：你問不感到寂寞？這就反問誰說寂寞一定壞處？ 

 

三宅唱或真有獨旅經驗，《旅行的意義》係浪漫讚頌獨旅，佢問有冇人明未必係望大家都明，而係搵出本來就明的知音。其他人悶到睡由他去，反正我只期待遇著本來就明的你。