《落葉》- 老派約會之古怪

 

若你睇過《爆炸頭田中》電視劇版，你未必覺雅基郭利斯馬基的《落葉》(Fallen leaves) 特別怪，頂多係賀來賢人夏帆都比電影裡男女更活潑。

 

怪在場景時間的處理，《爆》起碼肯定現在的日本，此片卻係女方家裡大部舊式收音機、男女約會舊戲院、同伴在老酒吧唱老歌、男女連帶旁人都沒個用智能手機，你差點以為時間不過二千年。就係收音機播起俄羅斯入侵烏克蘭，你才確認時間係二零二三。男女唔似係一般草食，而係「舊時」男女。點為之「舊時」？《潛行》劉華講「舊時」幾好都沒講明那個舊時，總之就係一首歌用心寫用心唱咁簡簡單單搞掂之時。戲裡男女就在只有張檯的咖啡店裡飲咖啡、舊電影院睇戲、靠手抄電話聯絡、女方家裡煮晚飯等，其實就係老派約會。老派同老土分別在於：老派現實還會有人做，老土如《不是你不愛你》係正常沒人做，因為弱智才會做。

 

另怪在戲裡人皆木獨：無論保安篤你偷野、網吧老闆嫌你十蚊上網仲要講價係侮辱佢、工廠老細罵你返工飲酒搞到工傷，大家都沒出氣動怒。你話這是芬蘭，靠近北極之國度，人皆涷到無反應，也亦因此冷酷，連帶收音機聽到的戰爭，整個冰冷世界。你或窒咁係因為你悲觀，當你睇到《窄路微塵》裡的劏房仲要被嫌太光鮮，你就知道你仲住緊的大屋還真太寬敞。

 

電影主旨似講老派約會之必要在讓人在冷酷社會中得到舒壓，像《芳華》般你最後還能戀愛所以別說社會對你太殘酷。似乎《潛行》應在芬蘭拍，當劉華真去到這簡簡單單境界時，結尾就唔駛難為佢用力講：「你奈得我何！」罷。