《盜月者》- 甩漏大志

 

袁劍偉一直靠吹，只係睇佢吹唔吹得中：正如沒讀過聖經就會覺《暗色天堂》的轉合係草率了事。《盜月者》（The Moon Thieves）你表面覺係功課做足，但細心睇呂爵安 (飾馬文舜)，講錶如何魚目混珠偷龍轉鳳還真係講多過做。

 

而且講得多卻又疑點多：馬專登速遞一疊影印本過自己，點解唔用email pdf？馬等扮豪客混進時計物語，時計經理為討好他們而打開夾萬裡的名錶，馬就在此發現moonwatch - 既然無價之賊贓，俾你得著也只會收至最深孤芳自賞，豈會擺出來現眼於二三流暴發戶？很多係做戲得太刻意；姜濤首次做奸，有人彈話佢無力狼到最後衰收尾，但若他正係個講多過做的二世祖，最後如此收科又沒啥唔合理。只係姜的設定令人想起《無雙》裡的「畫家」，要達到周潤發的境界，似乎還很遠。

 

若電影重點在moonwatch - 第一隻登陸月球的手錶，係擺在戲名裡卻又唔講得著重：馬偶然發現，到渠王（白只飾）只順手牽羊，由頭到尾沒想定它是目標。或者袁就深知：甚麼第一遠大志向都係虛無，像《後會無期》裡的鍾漢良講偶像是一棵衛星，要追隨NT3M5P，你以為有大志向的人可信嗎？結果第二朝他趁著你唔覺就偷了你的車跑了。

 

就係已預定最尾大團圓happy ending，咁有幾大志都係講下就得。但既然就知只能孤芳自賞，給我係馬文舜還不如分三隻畢加索平分給三人，自己去取回郵包才合邏輯。總體係袁劍偉寫了個大視野，內裡卻甩甩漏漏的故事。