《飯戲攻心2》- 名正言順

 

陳詠燊再添食《飯戲攻心》（Table For Six 2），只係黃子華不食這一套，問題一來了：冇左子華仲睇唔睇得過？對我而言反正編劇沒佢份，有佢冇佢問題不大，反而無左林明禎先係大問題。

 

但林的位置很是尷尬，直白講佢係攝石人，勉強給個名份就叫她「哎吔大嫂」，直到王菀之忍唔住告訴她「大佬」係想同佢分手，佢才問她在這個家算是甚麼？只係電影已近後部，無瑕再趕離一個人，於是大伙安撫她，話「哎吔」沒有掛名之意。

 

問題到二：有人指這套只在對白堆砌，只在乎新年給一樂沒意思。是否堆砌還看有沒主旨，就係陳想透過兩場喜宴說甚麼？上套陳似講明想到政治係你想到，若這套如是又要幫他去想，那就回到林問的：「我算甚麼？」- 是枝裕和常問的甚麼是家庭？定還只純粹同一屋簷下？後部大家水族館裡相擁，縱使彼此角色未定，卻像《羅馬》（Roma）一家連女傭被海浪衝擊後，大家視女傭為家人。像說經歷過就係家人，何需計較正名有份。

 

諷刺係相擁後竟出來執返正個場，擺好檯叫埋律師主持；林明禎唔飛東京，去非洲追返「大佬」，佢都係要爭做返「大嫂」：陳詠燊始終都傳統，嬉嬉哈哈胡鬧過後，還是名正言順的好。但陳又可道這係側面諷咁係因為你自卑，只要你有本事賺到遊艇，人們笑你油瓶仔你咪當聽做遊艇仔。