《芳寸之地》- 校服少女誰也愛，庫爾德人誰會理？

 

的確係橋唔怕舊，內田英治在《午夜天鵝》用得掂的，叫川和田惠真也跟住用在《芳寸之地》(My Small Land)。 

  

若服部樹咲都會令人偏心，這個似新木優子的嵐莉菜就更加唔駛講，仲要佢在戲裡接近三分二時間都穿校服：打比方係講學生成長紀錄片唔止《給十九歲的我》，仲有《音樂人生》，後者公映時銷情欠佳，同前者下架前每場爆滿大相逕庭 - 誰都愛看校服少女，係冇得解或係唔好意思解。 

  

但川和照用此橋又係會搞出同一問題：除非這只係嵐的寫真，咁近鏡拍佢日常生活，同奧平大兼拍拍拖等都好夠。只係你主題係論在日難民困境，主角重要設定庫爾德人，嵐就算五國混血，重要其中兩國係伊朗和伊拉克，但卻沒有講明佢就有庫爾德血統；開場字幕講戲裡出現三種語言，但絕對常用，重要戲裡嵐家裡交談都係日語。除了開頭的婚禮，晚餐的食物，那甚麼是庫爾德？就係無從突顯過。 

  

若重點原該在嵐父：原居在庫爾德遭土耳其迫害才唯有留在日本，怎料其卻給認定沒有難民資格，接近要遣返回國。只係想要你了解佢處境，卻落得如香港人於二零一九年頭睇《自由行》的尷尬 – 若返去又唔駛死咁做咩唔返去？更諷刺係嵐父被設成唔講理的嚴父，父親被拘留，女兒反獲得自由，只係生活艱辛一點，但總有方法胡混過去。 

 

後部更直率講出：只要父親放棄爭取難民資格，孩子們就可直接留下 – 這少子化嚴重國度，孩子少女好歹將會係寶貴人力資源，垂垂老矣的大人，還是點都搵理由請走費時浪費米飯。父親坐牢到中段已領略到，就窒話「這、是、日、本、好、客、之、道。」到最後答嵐先前沒收她的單車放在何處，語氣中似夾集著：「我而家唔搞啦，你開心返D啦。」 

 

若最後你見父親離開，少女留下，感到鬆一口氣的話，或就中了導演下懷：你哋憑咩話我只賣弄少女？你們根本就唔會在乎那老頭，我俾哂時間佢講庫爾德點樣點樣你地咪又嫌悶無視，即使你對其婚禮美食有興趣，但你又願聽他們苦難？就係我找到個美少女，才竟令你們去問 庫爾德多點。你批評我耍手段，我好歹自信嵐莉菜係自願拍我電影，今時今日這反似比拍紀錄片更合乎道德啊。