翁子光的《風再起時》（Where
The Wind Blows）正式上畫拖了數年，叫人以為來到美麗新香港，尤其某執法部門正如戲裡皇軍咁彈不得話都唔得。若當係審查事，但關鍵非於彈中了甚麼，而係審查的都抓頭：「我到底睇緊乜？」。就係国內很有經驗，都會因睇婁燁《風中有朵雨做的雲》睇到一舊雲，而拖左套戲幾年。
雖那又唔係神片如「天機」-
翁頂多凡人又未到孫健君個種火星神人。另一邊以為睇透佢只係懶王家衛，其實別以為有食鹽多過你食米既梁朝偉就有個種feel，王係唔會口水多過茶，唔會「一個橫跨三十年的故事」都要講出來，會咁操作既叫楊凡。
對此返王晶或就明大家抓頭之因：無論《金錢帝國》、《追龍》還是《追虎擒龍》，你睇完都易握主旨 - 無論港英無能還是借古諷今，只因王導下人物 - 貪婪警長、梟雄、定正氣ICAC，人物性格單一但清楚；翁卻係叫本來老粗的磊樂 （郭富城
/ 徐天佑）裝文青，就係亂世也會小清新踏單車，或如印度歌舞般起舞。雖知道你係想浪漫主義，但叫台下觀眾費解：「你想點呢？」
翁或駁佢就唔係王晶，佢心目中的磊樂南江 (梁朝偉 / 林耀聲) 就係個性複雜，而且既然四大探長，仲有嚴江 (譚耀文) 肥B (周文健 / 白只)，磊老婆蔡真 (杜鵑) 又似妹仔大過主人婆，年叔
(太保) 跛豪 (謝君豪) 這些亦不甘過客，就係許冠文的ICAC臨尾都要講一堆野搶下戲 - 故事本應係紀傳體，但翁卻搞到似編年體：既然橫跨三十年那時間係主軸，每時代分隔明顯，唔睇時間標示只看場景也分得清那時那代，但咁搞法，人物往往要相對壓縮。就係四大探長之間恩怨，至南江蔡真是否有一手，年叔跛豪等關係等，因講一忽唔講一忽，睇到叫人不明所以。
你問紀傳編年why
not both？當然可以：若你片長為四五小時，或為二三部曲。據說毛片長達六小時，翁都似係想搞長片，奈何現在多少人頂得順此長度。翁子光似想織件大冷衫，但落手才發覺毛線唔夠，於是織到衣型尚在但滿是穿窿。翁最無奈未必係懶王家衛懶唔成，而係如此壯志未酬。如此感慨，對上一次係Michael
Cimino 的《天堂之門》。
沒有留言:
張貼留言