今年香港國際電影節幾每套都爆滿話咁易，唯《失衡凶間》(Tales From The Occult) 到首映晚都仲坐唔滿，或係見到導演是誰會叫人卻步：許業生新手上路，陳果同馮志強近期作皆杰。重要係鬼片卻又唔上三，已經預左恐極有限。
陳果o係播完片後重要話拍鬼片該愈來愈艱難，謂可能係最後一套著大家支持，但其實三片共同主題都似話只係人心中有鬼：就算爛面死灰定係侵入者，都冇正名過佢地真係鬼。既然未有人出手你已自設紅線，故這套是否最後一套又有咩所謂。
先衝出口講鬼只在心底既係許業生：〈暗角〉先叫鄭丹瑞扮醫生講當年如何「造鬼」再叫人扮道士收拾，再發現係好友設局還是痴漢入侵，定還是只係顏卓靈自己發惡夢，總之最後顏真係撞邪定精神病係無講明。聚焦人的陰影卻唔詳盡，即使把最多餘的關楚耀略去，都未夠時間講明顏卓靈有冇搞掂鄭丹瑞。
陳果似學起婁燁：〈死場〉叫林曉峰拿手機直播 - 手搖鏡頭製造唔安份，都係唔講明有鬼，卻係三套中最有野想講：疫情中通街戴口罩時唯一戴防毒面罩的復仇者，林亂丟煙頭嚷成巨禍，結果遭燒車攬炒
- 記憶力好些都聯想到某些事，陳所云就快拍來艱難可能就此意思。要批係蘇麗珊簡直煩西，唔係見其好歹會推進一下劇情就該把她省略，話雖其他女性都類近地膠。
馮志強反係三套中最成熟：〈唐樓〉雖演員如其餘兩套地多，但大多真只點綴。主幹在扮羊實狼的吳海昕和被誤以為羊實則膽小的羊之任賢齊，係最想探討人的背後。奈何又係懶開放實爛尾的結束，最起碼係吳任兩個當面大對決才算真收到科。
綜合三套缺點就係話短片也太短，起碼每套拍一個鐘先講得盡。但始終你唔敢講明係鬼，那甚麼都只杯弓蛇影。無論出甚麼聲效還是面如何的爛，都早心知係流野。當然你可話人比鬼更恐怖，但既然如此，又何需慨嘆講鬼的門快沒？
沒有留言:
張貼留言