《阿媽有咗第二個》- 戀母泥氹上踏鋼線

 

俾你係花姐，會諗姜濤同柳應廷的電影處男作搵邊個來破？彭秀慧你以為係穩陣的選擇？睇怕未必。  

  

唔打一級，《阿媽有咗第二個》(Mama's Affair) 你會想到是甚麼故事？毛舜筠係阿媽美鳳、柳應廷做兒子子軒、姜濤叫作方晴，也就係「第二個」 - 那就仿如法國總統馬克龍的婚姻，你硬作開明問有咩問題？咁請你再睇埋馬淩偉的《生前約死後》–一套係咁阿媽阿媽，你頂唔順時就會領略到問題所在。  

  

方晴年幼喪母，難免把美鳳視為母親，於是遠赴韓國也要鳳陪同；子軒不甘母親被奪走，與晴在海邊打起交–兩人爭母爭到同戀母只有一線之差。你話彭到最後始終沒有越界，但其實風險一早存在：彭已近五十路，就如美鳳–遭丈夫兒子冷待，就另尋自己存在價值。 有個年少俊男看重自己豈不心起到飄飄然？彭或毛那代人或會很享受，但姜柳那隊人就唔止照顧那代人：正如你見余香凝面對毒撚岑珈其都冇諗過要坐時光機去欺凌佢，但余睇住戀母狂馬淩偉就面黑到豈不是想拿起塊板一野車巴佢？

 

彭秀慧冷靜落來就很是識趣，知道一越就叫姜柳跌落泥氹，因此寫了個一級誰都適宜的故事。但你照顧了大家卻又顧唔掂少數：就係那個美鳳 - 同老公離婚，方晴又遠走，你現在還有兒子陪睇話劇，但劇落以後，你兒都要走上獨立的路。認真孤寂的你，真唔需要再找第二個？彭很會扮慈母，外人目光下始終要對兒子好，但仍睇得出你係心痕痕。