自從看過有村架純主演日劇《新人保護司．阿川佳代》，總覺得要向西川美和講句唔好意思：因為質疑過《東京蒼穹下》橋爪功的退休律師去當釋囚擔保人係唔像真，現實卻真係有保護司這種無償去照顧釋囚的義工。就算你以為東京人際疏離，但好歹都二千萬人 - 即使百樣人中只有一傻更更的好人，這城市裡都共計有上百人，以偏蓋全其實還真唔公允。
只係睇到電影版《前科者》(PRIOR
CONVICTIONS) (岸善幸導) 卻又睇唔順做保護司做到疲於奔命的佳代，唔係我憐香惜玉架純，而係猜疑為何熱心到如此？從而回想之前質疑或都一半對。
佳代幾近無私為每個釋囚仆心仆命，就叫人疑問佢唔會累咩？你話返工或做運動都會累，但返工係有報酬，正常運動你係懂得調節知道那個位置要停。佳代卻係生怕一停下，那釋囚就無得救咁。打比方小弟行山時都會執垃圾，但卻唔會成個行程都在執，更唔會有著自己唔執成個山就無藥可救的念頭。而佳代似係戲裡被喻為「聖人」卻被槍殺的社工，聖人根本難以亦無需要達到，奈何很多人卻享受此名份，而被綁架卻不自知。
你話佳代的熱心係來於學生時遭遇，因此希望透過協助釋囚避免慘劇重現。這卻係把人家當成自己，戲裡工藤实 (若葉龍也) 殺害多人，只因相信自己的悲慘就關乎那些人。電影也有意無意放大誠（森田剛）和实的悲慘，差點令觀眾以為遇害者死有餘辜。始終自己人生要自己負責，正如日劇版古川琴音會選擇再投獄，電影卻係搶著當你出獄後我仍會幫你，你卻似硬把別人人生搶去。
正如佳代問律師宫口 (木村多江)
為何要為誠繼父辯護，宮口答即使殺人犯也會改過自新云云。香港該唔會有這懶偉大的答法，或係另句：「我只係在法援處接單，為當事人爭取最大權益係律師職責來的。」或係自私，但卻順耳。或者世上還該時不時有一點自私，過分無私其實就只對自己殘忍。你不應綁著他人人生，也不應把自己人生給他人綁著，對嗎？
沒有留言:
張貼留言