《被消失的兇案》- 羅守耀會令你殺人的第三度殺人

 

反正之後都係彈或恥笑，不如開頭先對羅守耀來兩點肯定：一係肯嘗試各類，縱使你會窒係畫虎不成反類犬；二係這誰都雞飛狗走之時勢，羅仍敢大把錢拋落去拍片，總算確係有心香港電影之人。 

 

肯定說話真到此為止，講真我真唔敢推薦大家入場，聽清楚：係唔敢。除非你和小弟一樣早知羅氏何許人也，知道睇羅作係絕不能抱認真心態，那怕有一點認真也叫你輸得徹底。 

 

為何要將《被消失的兇案》(A Murder Erased) 同《第三度殺人》扯上？後者係是枝裕和作，都講一個男人為保護一個女人而帶大家遊花園。別講笑羅守耀除左疑案都會講親情問家庭，只係羅一直都係那個問題：想拍底層卻又離地 - 唔計個D現實冇人講得出口的對白，好簡單你搵到陳靜來扮我見猶憐的弱質女子，但你會唔會度返個佢跟爛佬何華超的理由？雖然都係個句羅氏野認真睇會死，所以我當羅只係想益街坊，叫陳著得緊身有個大包賣下咁。

 

其實何華超橫蠻都遠不及羅守耀咁唔講道理：會計妹自爆虧空公司、小姐自爆做雞、張兆輝老婆在掃黃時被捉到等　-　同兇案無乜關係九唔搭八，卻又擺大段時間大堆對白架層疊屋。以為演員如邵美琪點都會Ｒ頭問我究竟講緊乜，但羅似只回窒句：「我叫你講就講啦。」追開羅氏的老早習慣佢的自以為是就知恥笑就是，但沒睇開固然就係眼突連連。

 

但沒想到羅今鋪叫老觀眾眼都突埋：講返《第三度殺人》，是技叫役所廣司左搖右擺，唔止法庭連觀眾也感被玩弄。羅竟仲超越左是技，就係叫JoeJunior個律政署頭頭結尾講左句：「嗱，我頭先係廁所見到有人痀屎唔沖水，我諗我係咪要為著舊屎而大鬧成個律政中心死都要搵到邊個痀屎唔沖？其實只係一舊屎者，自己沖走咪係囉。」於是案件close file，洪天明無罪釋放　-　老觀眾驚嘆好耐無睇過此叫屌聲仲大過《滅門》的結尾：你鍾意話咁就咁close，咁開件案來做乜！？你拍套戲來做乜！？我到底又睇緊乜！？《第三度》役所撚鳩法庭，法庭就毫不客氣判佢死刑。現實羅守耀咁撚鳩觀眾，若有人道行唔夠深，戲裡的兇案被消失，卻換到有人睇完戲割爛櫈唔夠拿埋刀出街斬人。

 

所以話羅守耀生人勿近，另邊廂或有人以此叫大家唔使咁驚国安法：《被消失的兇案》如此危險得過乜乜革命既戲也能讓它上大銀幕，說明香港真好能夠言論自由。