《女人街，再見了》 - 我睇左邊條街？

 

關永忠離開無線轉做電影導演的《女人街，再見了》 (Ladies Market) ，單從片名已覺畫蛇添足  -  只女人街就夠，加埋再見我就會問究竟向邊個講拜拜：係女人街？但戲內外女人街最終消失左？沒有嘛。難道再見係同廖啟智講？但你咁搞唔會覺係把牛頭馬嘴搭埋？ 

 

睇海報你以為主角真係智叔，但再睇簡介你實會問主角乜唔係細路梁珈榕咩？睇落去眼球又會注視Bratop熱褲劉心悠，又覺男女平等就應望埋久違了的吳卓羲，跟住又見艾威塞多件細路女馬雪澄 – 對比陳果《細路祥》，問題在於不知誰是主軸，當然你可以話金綫咪就女人街，但鏡頭始終都聚焦人物，係背景同搵部航拍影下排檔，但喺香港排檔就只有女人街先有？假如戲名唔講你點話我聽呢條係女人街而唔係銅鑼灣渣甸坊？ 

 

最大問題係你的確企喺女人街拍這套戲，但我總覺得背景都似廠景，戲裡人物多窮撚但多光鮮亮麗，就係梁珈榕頭髮夠亂奈何白雪恤衫搞到唔連戲。問題似在燈光太亮搞到離地，雖然好在就把劉心悠照得夠白滑，但對佢無興趣的實會窒做苦力咁耐竟一點都唔粗糙，你唔好同我講話係佢keep住飲FA_CL。 

 

若要睇故事架構係上部呈散，但還好在梁珈瑢有小古惑、智叔落哂力的市井，但下部馬雪澄到來就演變成追逐，卻係拿拿聲收尾。更似搞到吳卓羲照抄《無間道》簡介咁自爆，其實唔好當觀眾腦生草諗唔到，而且我都冇興趣知你係臥底，正如心悠細佬點點點，你就咁講下我都諗聽來做乜。 

 

你會覺得我亂鳩咁噏，但就覺得關永忠想拍女人街就應住夠佢一個月來度劇本，現在只係佢諗到乜就塞入而唔係由女人街發掘，正如又唔係《細路祥》的一九九六重講咩無證兒童；若你只得八十八分鐘而且真想懷念智叔，咁不如只講佢同梁珈榕。但你重要加埋劉心悠再大堆人，多到我唔想再理呢條係乜街，咁我都係睇返白滑心悠算，其實你都係想咁啫下話。