《媽媽的神奇小子》- 誰傷樺偉？

 

別嫌我潑冷水，尹志文的《媽媽的神奇小子》(Zero To Hero) 叫我想起王安石的《傷仲永》。

 

沒讀過或忘記這經典中學課文不要緊：係講一個叫仲永的人，幼年時係懂寫能詩的天才，其父親因而借他向同村人炫耀兼圖利，卻不讓他繼續學習，於是其十二三歲時能力已大不如前，成年時更和普通人沒異樣。

 

蘇樺偉 (梁仲恆) 的故事其實大致類同：自從被發現有跑步天賦，至到首次參加殘奧就奪金，跑就佔據其人生絕大部分，其母 (吳君如) 不甘他去做速遞，他也做唔慣也實做唔耐廣告模特，唔係電影開頭寫話劉德華照顧著他，一到尾你就會問唔再跑的他到底如何走下去。

 

或比《傷仲永》更悲哀：仲永作唔起詩咪就做返個普通人，但蘇跑唔到，竟會被質疑其生存在世又有甚麼意義。就係連其母都咁諗：講到白生細佬係望其養兄。明明蘇只係痙攣又唔係弱智，連速遞都做到就唔見得全沒自理能力，問題在於他除了跑就再沒學多其他知識和技能，似係隔離左右都以為他學不了，就只因大家早把殘障同廢人劃上等號。

 

蘇當然不願被當廢人，不甘溝女都要靠老母，在運動場上埋怨人生都受制於母親，令其不能成為正常人，正如仲永被耽誤矛頭都指其父親；蘇媽同時在呻照顧他最艱辛係要抵受世人誤解，就係旁人都指責她迫兒子去行去跑，卻只有她才知能跑的兒子才有生存在世的資格，也是怪責目不識丁的父親沒讓仲永學習其實不公道；問題係電影裡那有人直講過如蘇般的沒長處就不應留世？反正如士多老闆出於好心請飲汽水，但蘇媽當係睇佢唔起視為惡意。故還只是你自卑，實係世間都視你普通，只有你唔當自己普通人？

 

或者應咁諗：蘇樺偉被迫要拍廣告維生，李麗珊又何嘗唔係 - 殘障和健全運動員光輝一刻過後其實沒兩樣，唔會永遠衣食無憂，但就係唔使過分擔憂。想通這一點就唔使再諗跑完以後，因彼此也是普通人。