《一秒拳王》- 香港始終香港

 

對趙善恆同周國賢，《一秒拳王》（One Second Champion）是他們的標誌。 

 

周國賢終搵返個係佢的角色：四十歲人根本就唔應該扮中學生，人到中年扮返個頹廢中佬咪就岩哂。但周更進一步係在兒子面前仍有點父權意識，想兒子相信自己係好爸爸，這異於《激戰》張家輝或《百元之戀》安滕櫻般自暴自棄，你或會覺順眼一點。 

 

趙善恆情況似麥浩邦，首作《救疆清道夫》沒啥好講，來到第二套他卻撞彩地講中時勢。又或者見警署門口的水馬，拍攝時間正係二零一九至二零年間，趙似自己真有超能力，預測到下一刻會有甚麼發生。 

 

你話廢柴周國賢加拳擊，咁同《激戰》有甚麼分別？關鍵就係周廢極也有看到一秒後的超能力：若《激戰》點到只係講一個人，《一秒》的視野更大，周國賢實比喻香港。 

 

二零一九年前香港，又係常被批難以寸進已經沒落，但仍係亞洲言論最自由，在世界經濟自由度排榜首之地 – 這些就像賭大細都嫌買唔切的一秒超能力，大把似覺得食飽就好的豬認為沒用，但人沒為意超能力係來自一場意外，正如香港的優勢，並唔係天經地義永遠皆是。 

 

於是再來一場意外，周國賢失去那超能力，就如香港於二零二零年七月一日後失去那我們以為必然的自由，大把人概歎香港已死要走，但仍有更多人出來高呼我好撚鍾意香港：沒了超能力的周，卻仍能堅持和拳王Joe對戰足十回合。電影結局沒講明誰勝誰負，只因為這不再只講一個人挫敗到盡要靠逆轉勝一場，而係直情問一個人一個地方：你失去那些優勢，你到底真係自此一沉不振，還是仍有力氣，堅持上臺打到最後？ 

 

趙善恆所相信：即是被套上緊箍咒，但孫悟空始終都係孫悟空，只要能打到底，香港始終是香港。