《緊急救援》- 講人定勝天前請先問自己係咪個人先

 

話說小弟終體會到「攬炒」的害處： 

 

小弟居住在一個老左區，早些年就係《流浪地球》上映時，那個「愛国」福建人區議員還會搞廿蚊早場優惠。二零一九年區選該區議席被「攬炒派」奪走。結果《緊急救援》(The Rescue) 在港上畫一星期，屋企信箱依然未見宣傳單張。睇來係該「愛国」組織在懲罰選民：「你要攬炒嘛，我依家就炒到你冇得廿蚊睇戲！」話雖小弟從不領受該組織任何恩惠。 

 

其實該組織如此發選民悔氣也膽生毛，因為《緊急救援》如同林超賢之前的《紅海行動》或《湄公河行動》，係任務型電影，就係吹我国很好很強大云云。就算外人不信也要滿足「愛国者」自慰需要。但「愛国」老者就係有多數十元都寧落屯門公園都唔捨得去隔離戲院，怎保證入座率？話時話適逢戲院閉關一排又開返，人人渴戲已久係戲都看，入座率保証到下有人乘機將原定買座位的錢落哂格都唔奇。無計啦搵食艱難，一切都係占中黑暴攬炒的錯嘛。 

 

雖然小弟始終會俾足錢睇完戲先評，但都係先入為主認定係「做戲」，因中共對待生命的態度都是那樣子：一眾拯救隊員檢討事故，大家在爭論該從那個位置著手，要顧及隊員還是待救者安危為先等問題，聽其左一右一自己心裡卻響了一句：「駛乜拗咁多，睇領導喺邊先去救佢咪得囉。」你話做咩又要攞返一九九四年克拉瑪依單野來講，咁《戰狼2》最尾說了甚麼？《紅海行動》的12308有冇用過？你狗改不了吃屎地吹水吹到上天花板，人民咪一直當你係周幽王。 

 

林超賢或就知如此賣廣告只遭恥笑，於是硬加個細路搭彭于晏搞D溫情，問題電影本身就只顧「完成任務」，所以細路對白根本唔似係現實五歲細路會講既野，就係《殺人犯》譚真一都講得真過佢。林唔記得《激戰》裡做細路係唔駛講咁多，因為要講多只有主角就夠，但這套一開始就已經唔係從人去出發，就算記得都注定搞唔掂，所以還不如唔好畫蛇添竹。 

 

細路患癌命危，彭凝望著天似怨天係咪要玩佢，原來只顧任務卻開啟了個論題：人定勝天？這也是中共一直炫耀的。但就算你裝備齊全，困在大火油輪底部你都係無奈等死。唯待油輪斷裂，海水湧入撲熄大火，你才能順著海水浮上得救 – 在廣闊的天下人無法逆天而行，始終要謙卑自認渺小，順流才能找到出路。 

 

但順流逆流還只係林超賢意外打開，歸根若不自覺始終係人，就會繼續咁去自誇勝天，會依然繼續不切實際：顧隊員安危定還是不顧一切救人先？你老實想答都係問左領導喺邊先，但你卻硬著頭皮重覆生命點重要，人家看著你硬幫幫的樣子只笑你做戲做得屎。