《繼園臺七號》- 楊凡的時代

 

久違多年的楊凡，這回搞了一套動畫，香港首映後有觀眾問他看這動畫前有甚麼可作觀前導讀，小弟差點搶答：「可以翻看《流金歲月》、《桃色》、《淚王子》，以及回顧一下他上年說過甚麼話。」 

 

《繼園臺七號》(No.7 Cherry Lane) 明顯係楊凡多年集大成，唯美的畫面當然有，有人質疑動畫少了格數以致感覺緩慢，但慢本來就係後期楊作的鏡頭狀況，就係所謂慢條斯理的優雅；畫面呃到人但一講野總係嚇走人，《流金歲月》的口水多過茶到依家都係唔改，楊口說交觀眾自己解讀，實則卻不信任觀眾而加旁白解釋畫面，尤在范子明首上虞太太家情況最嚴重，畫出腸地叫觀眾唔駛自己諗，更簡直當觀眾都係盲人。 

 

其實楊似太著重畫面而忽略演員對話：林德信的語氣時而像機械人朗讀般唔自然，只係有經驗老到的張艾嘉來調和。 

 

記起上年楊凡評反送中運動的香港觀眾，今次或又叫嚷罷睇，又會嘲有些近如《鳴鳥不飛》裡的畫面，影視處又真係盲左沒評上三，作藍人果然多優惠云云。好心為楊辯護係他未必真藍，而係正如電影裡虞太太那種人：看著北角街頭的左仔示威群眾，又講起中國的文革，她沒帶范子明栽進去，她知道這些青年都係被利用的一班，而她卻係安在象牙塔之上的一群，自持食鹽多過你食米覺得你們很幼稚所以不太問世事。只係那是訊息不如現在流通的六十年代，換轉今日，楊凡自以為孤高的繼園臺，只會被嘲係井底。甚至既然你甘願收埋自己落井，又何要埋怨無得搭交通工具周圍去？ 

 

楊凡說這套唔會拍真人版，話係環保叫人發笑。其實《繼園臺七號》不在乎外面如何，只係講一屋內俊男享母女丼，說係甚麼時候也可。問題唔止係吳彥祖馮德倫等已老，而係楊突覺得拍出來會叫貝托魯奇恥笑到翻生：《戲夢巴黎》裡一群廢青大披同眠也會被一個飛入來的燃燒彈叫醒，而楊的時代就係看著地鐵裡無辜市民被打到頭破血流甚至喪命，男女卻只顧偷情並怨地鐵停駛令他們無得落戲院。