《BABY復仇記》 - 我唔想知你地呻乜呀

陸以心五年後再有一套，陳靜終做返次主角 - 《BABY復仇記》 (The Secret Diary of A Mom To Be) 點講都係難得，奈何出師不利：這時勢開畫未必問題，問題係一開某電影資訊App就見打著了二三等偏低分數，搵多兩個打手拉高個分都費時做，雖肯定片商老實，但仍要知電影問題出在那？

一開始就浮現的係電影的定位不明：以為有點驚卻當然唔係驚慄、當愛情喜劇又總唔叫過癮、較貼切係現實主義 - 像拍紀錄片般跟住一個準媽媽，但出到張繼聰又顯突兀，叫人問其實想點撚樣？

點解會諗到驚慄？就係開場不久陳靜心底衝出的「仔死左老母先會發達」，即使聽唔切這句，片名都早講左：老母與自己胎裡水火不容，覺得係自己一切阻礙想打下來，但陸以心想表露港女私心的勇氣只維持了上三分一，及後即使陳靜努力擺出個臭四格，卻始終做唔到個自私的老母，依然被周邊調教成那種含辛茹苦模樣的阿媽。講返你唔係同自己個B有仇咩，點解戲一半都未過就連戲名都唔記得左咁？

陸以心上一套都係如此少鹽花，《同班同學》都係偷窺般拍著三個少女的性事，只係上套成功在於只講呢D點都勾到一大半觀眾興趣。但今次呢？講真我有乜興趣去注視一個著得密實的陳靜？佢講的做媽媽點辛苦，朱鑑然的老公點難做，其實我唔想知。對於一班更卑微的打工仔，見到一件所謂女強人在呻個B點阻住佢發達，只更不屑關我撚事。即是像怨婦碎碎念些不叫人出奇又不能叫人共鳴，只會愈看愈煩厭，竟叫人寧看手腕的破錶都費時看銀幕的美人。

陸以心或本來想無添加去敘述母親之苦，奈何海報連戲名叫人有另種期望，結果搞到散場時大家都叫悶呻搵笨。講真與其駛幾十蚊入戲院去了解，點解唔直情早點回家同阿媽傾下計？