《人妖阿發 痴人三部曲 1/3》- 不要問，只要睇

這瘟疫橫行之時，羅守耀乘亂回歸，還真叫人覺平地一聲雷。問題係會賞識羅氏的真少之又少，即使沒多套港產出爭，仍只能全港限定一星期圓方每晚上兩場，叫返夜班又唔住開個頭的響應也難。難得有個平日夜晚入場觀摩，入座率見偏高，每聽到羅式對白時，聽到隔離笑聲但只屬偷笑，就知大家都係同道中人，但彼此都未能如看《The room》般開懷，到底羅守耀還欠了甚麼？ 

多年再來羅守耀的導技似有變化，就係叫冗長沉悶：以為你地未見過人妖，又自以戲名叫得《人妖阿發》 (Nights Of A Shemale A Mad Man Trilogy 1/3)，鏡頭就不斷於人妖埋穿梭，叫你睇人妖show又見其波又見其撚，但老老柒柒人妖夠靚都還好，就係林上唔靚咪嫌哂時間；預料真係睇哂三部曲時，你都會問其實分三份做乜春，就這一部大把情節：例如唱足兩次Happy birthday，你係岩布仙尼都會覺不如一槍殺左我，咁你係咪覺得應該剪哂？ 

或者你努力睇完都唔明阿發為乜走到泰國做人妖，其實你唔需要明，羅作主角一向都很有性格：如《疆屍新戰士》的「我要做疆屍」，《衝鋒戰警》的「我要做軍裝」，點解咁做都唔使向觀眾交代；要講性格更要留意對白，到今套似乎明曉：阿發係道友，又成日同阿妙隊到冧哂，難怪講既都九唔搭八 - 例如互被隊屎忽時竟可相約船P、聽到孕期得三個月可能懷孕的自己都唔察覺，竟之後仲問點解個老婆唔同佢講、上一分鐘先傾好去爆格，下一分鐘返到鋪門口時竟先問你做緊乜，睇得出戲內個個都呈迷糊狀態。或者羅氏電影世界裡，無論疆屍定差佬其實都係Take開野，咁羅氏作品就可全部平反不再叫爛。 

總以為一戲接百樣觀眾，羅守耀會有死忠也不出奇：自我流放到異地最後手刃壞蛋的阿發，有著《Taxi driver》或《德州巴黎》主角之影。曾留學LA的羅守耀，就係把這種美國男人帶到香港 – 平時懼弱卻又渴望做英雄。現在只得一部仍未看清，或待三部推出，並有有心人再剪，才可見真章也。 

問題係這一部片尾卻大大字全劇終，到底餘下兩部真是說好的嗎？其實羅守耀一直擺出的態度，就如《精裝追女仔2》〈大哥講話你要聽〉的乜議員的：「不要問，只要信。」若要問跟住兩部曲出唔出到，還不如先問羅生厚臉皮出來謝票時會否被觀眾追打才好。