從來都話王晶係投共影人中最醒目一個，吃相核突仍能混到今日係知道你們要甚麼，《肥龍過江》 (Enter The Fat Dragon) 叫你以為又係賣甄子丹，入場一看才知係翻炒仲唔止，更似係王晶寸大家：「邊個話藍絲唔賣得李小龍？」就是通街都講如流水，這套都最後講左。
當然你會懷疑王晶是否真致敬：佢從來都係惡搞專家，《精裝追女仔》就搞過《英雄本色》同《無間道》，就係今次佢都叫丹爺笑返自己的《殺破狼》。若唔諗咁多陰謀，當他只係個生意佬，用谷垣健治係他算得精確 - 難得一個港日皆通，就唔會重演如《信用詐欺師JP ：香港浪漫篇》的水土不服。
擺明居馬的搵食片，你還想看出內涵？看發脹的丹爺都會想到：中年人事業愛情不得志，轉到異地望能闖出另一片天。論過江者卻又和以往大不同，李小龍到洪金寶都係年少氣盛，丹爺即使都扮到魯莽像《街頭超人》(Hancock)，但東京街頭打鬥都在搭建廠景，東京鐵塔上的決戰更係藍幕之下 - 一切擺明保守，保到叫人懷疑所謂過江實只過左深圳河。
相比十年前的爾冬陞或三年前的吳宇森，他們即使遭到訕笑都真闖到東瀛。現在的王晶，卻沒真膽量翻轉東京，只求保本乘時賺個小利。或者佢還會狡辯：「你們的Be water咪又講不被捕不流血，大家都係貪生怕死之徒，你憑咩話我講唔起Be water？」
沒有留言:
張貼留言