《女皇撞到正》 - 欲言又止很冇癮

甄栢榮這新手上路總係有問題：可能真係那有錢你老母，唯有想本小利大，但唔關乎錢而可發力的又唔見得他會盡力。

《女皇撞到正》 (Hotel Soul Good) 和《救殭清道夫》都係嬉笑玩靈異，算技術廉價我不向你深究，畢竟你係借鬼講人情。但只看劇本我還同你計較更多：上次可講兩代衝突，甄又留手唔乘勢諷刺而去討論更多，到今次又係咁。

原係孤兒的美琪長大成人後做到酒店高層，但撞鬼後事業愛情跌到谷底，但因此她才見回「家人」，才可重新上路：用周秀娜演這角似係故意，縱使她年紀上早就唔o靚，但臉容仍叫是童顏，她的硬朗叫係硬著頭皮扮出來 - 就算可獨立還是心底渴求被人照顧。但若意識上想叫你「認祖歸宗」，吳耀漢葛民輝和邵美琪等「家人」除了叫扮八十年代的人，還會突顯出是甚麼人？叫你歸家唔係問題，何處是吾家才是最大問題。若你叫唔好想到咁複雜 - 其實甄又是想追憶80S，咁「皇家香港警察」、或老土卡通OK，我做咩要留戀這些？

張繼聰那條線卻又詭異諷刺返周秀娜那條：張子進係留戀清純的琳琳，豈料那個琳琳一直怨恨張困死著她。甄又係過分仁慈 - 張開到天眼之時，又唔叫琳乘時大罵這個自作多情累死人的戇男。反而這個男人還醒覺得夠快，最後還放棄過去叫放過他人也放過自己。電影好歹還是嚷人不要太執迷過往，仍要獨立前行，總算做件好事。但電影始終欲言又止，有位大罵又唔罵落地，就算人醒了，仍以為像發了場南呵一夢，只打個呵欠，沒有如一巴摑醒的快感，又係冇癮戲一套。