《電子靈》- 為何不去打爛手機？

 

其實所謂探究年輕電影多不勝數，只因執導的你以為自己就係年輕過，於是你就在這裡踢到鐵版不自知。你以為梁碧芝係新晉年輕？其實佢首套長篇電影《不能愛》拍成已在十一年前。

 

你話唔係年紀大就必然自持食鹽多過你食米，故還是要看實據：《電子靈》(Social Distancing) 缺點多多 - 廉價一嚇避重就輕幼稚驚慄、片長一百分鐘都唔夠卻貪心想講多兩個又無本事講得透切、肥皂劇式乜都講太白，就係直講「你依賴手機？還是手機正在控制你？」於是望李靖筠見手機有乜狀況得驚親死，我只納悶地想：「你有冇諗過打爛部手機一了八了？」

 

故事表面探究人際疏離，實際態度似肆意教訓年輕 - 李被描繪到很是無能，既依靠手機又依賴兵仔般的楊天宇，在「電子靈」裡過關時，都係迫其面對怎冷落家人出賣朋友，搞到其痛哭流涕才讓她過關，其實就係叫你要去屈從，故此口話叫你反思只顧「低頭族」，卻最後還是那「電子靈」會纏著你問你繼唔繼續玩，而你又係不知所措。

 

論此電影不懂年輕，在於其否定年輕人去反抗：圓子溫的《屍奔女子高校》，主角玲奈自以為在玩遊戲，卻係被人在玩遊戲般操控著，但她最後卻尋死，以背離遊戲求生規則以得到自由；故此愈睇愈唔耐煩窒為何唔敢打爛手機 - 這已係最簡單反抗，但佢竟就冇諗過做。

 

或你又會翻出小弟曾講的：顯然缺點實係用來掩飾心底所想 - 電影時間二零二零，唔止係世紀瘟疫，也是国安大法橫空出世之年。自這年後，遊行集會以至到畫諷刺漫畫，這些往日說不上是反抗的，今天也被視為大逆不道之罪。《電子靈》其實就係暗喻那種高氣壓，所以未必只嘲諷李靖筠沒種打爛手機，因為換轉係龔慈恩還是那個，他們也沒種打爛，大家都迷失在這場美麗新香港遊戲。