《殘影空間》- 所謂自私

 

《殘影空間》 (Shadows) 上畫後反應兩極端：有影評人睇到拍哂枱大罵簡直劣作，另批觀眾感覺還可，小弟屬後一批。或者唔睇影評，睇其他表面野來推算入場風險：海報係鄧麗欣正中大大個，在其下方有啥 - 余香凝、張建聲、凌文龍、蔡瀚億......都係些會叫你感到係不甘旨在襯托佢既人，你會問這個新加坡來的陳志文係太大膽，還是唔清楚搵返來的演員？ 

  

睇得出似要安撫會唔安份的四人：凌要俾佢祭壇、余要學今敏《藍色恐懼》咁俾佢浴缸、張蔡都要俾佢地爆下。姜皓文謝君豪係另一主角先似唔使點俾，真唔使俾的係袁富華，或係因為佢「另有用途」。 

  

就係片長只有九十五分，被認為根本容不下多人，致幾個案件都似彈下出來算講唔足呈散咁。但睇四案各職業：余豪門少婦、張社工、凌護理員、蔡教師–都係要裝斯文連一句怨言都唔可以當面吐出。再望袁富華，諗返《叔・叔》，赫然就知四案共通–全都係懶好人懶到爆煲，點解叫懶係你並唔係真心想好人，而係顧慮別人而壓抑心底所想，就係鄧明明憎恨其父，卻硬說沒有憎佢。的確正常的只有行事粗獷的姜以及認為人本來自私，你當我係仆街我都無所謂的謝 - 兩人都唔駛理旁人，從而輕鬆做人。 

 

有人窒電影爛尾，只因最終沒定善惡，及交代謝有否教唆他人殺人。但質疑卻似墮入陳志文設的諷刺圈套：係咪我畫出腸標籤明謝真係奸人，叫鄧或你們心安理得就得，這豈不是又係一種自私？人性本善定惡唔重要，重點係所謂自私 – 實係講人唔會坦承面對表露自我，卻把從自己出發當成貶義，於是抑壓自己嚷成悲劇。要數真兇，未必係提倡自私的真小人，反係只顧慮別人點睇自己的偽君子，這種人可以係你與我，只要你覺得做人係應該懶好人。 

 

陳志文或差在太斯文，就如謝君豪咁任你指罵扣帽卻沒怎費氣駁辯。原本開放式係讓你自想到結局，你卻擺出個「屈我啦屈我啦我冇問題架」的模樣，於是人家就對你毫不客氣，但實情點，就係冇諗過。