《媽閣是座城》 - 大陸女人給澳門的「包膠」

《媽閣是座城》 (A City Called Macau) 歸名思義係講澳門，戲名平凡但內裡似不懷好意 - 導演李少紅係大陸人，故事作者嚴歌苓係美籍華人，她們本身就唔係出自澳門的人仲要係女人，而媽閣之名係取於媽祖 - 情景就係一群女人數算一個唔認識的女人，女人比評女人往往都係妒忌和計較。

首先主角梅曉鷗的選角 - 她是個比擬澳門的角色，本來最應該搵中葡混血的梁洛施，搵唔著還不如叫劉嘉玲擔正。現在就係搵白百何，她就是一句廣東話都唔講，給澳門觀眾睇，我想就係一臉皺眉頭：「你甚麼意思？」

就係不同澳門在地人，如《骨妹》徐欣羨或《愛比死更冷》何飛，李少紅或嚴歌苓的眼光都係表面 - 就以為只有賭，於是就用來做故事主幹。場景聚焦在賭廳，其次海邊別墅、高級餐廳、路環教堂前 - 都係離地的，用來服侍遊客的。你話史奇瀾 (黃覺) 無錢時住的破落旅館呢？但這不是《2046》的場景嗎？早用到爛了。就係《過春天》般的獵奇眼光，你以為比本土更本土？真正本土的或一句窒返你：「呢D關我撚事咩？」

梅曉鷗係疊碼仔，這亦引伸她和段凱文 (吳剛) 、史奇瀾、盧晉桐 (耿樂) 等的情緣。像《深夜食堂》第十八卷炸豆腐篇，老闆感慨少女總愛不成器的男人。當然「公允」去看，段史沒碰上梅，可能是成功的地產商或藝術家至到二零一四。縱使梅沒怎去誘使他們留在賭檯，但其他女人都指控她是令男人變壞的蛇。這相異於《骨妹》口吻 - 即使你不如於其他人，但我始終最愛是你，完全感性；《媽閣》卻先講明你根本係壞女人，卻又無奈你竟要承擔過多帶壞人之責任，係所謂的理性 - 不留情地挑剔後仍都有些少婉惜。

《媽閣是座城》注定唔係給澳門的情書，反似點評小姐的「包膠」：就係評你外貌身材技術服務態度好唔好，都係外在的，口痕或會加多句同佢傾開知佢生活有點不如意，但始終我係客，我對你有情我就係「沉船」我就完。情書卻係我真的了解你，並對你有不顧一切的情感。就算你係女權主義話甚麼「包膠」很難聽，你也不能否認這套係女人評「女人」 - 戲裡女人們如何對待梅曉鷗，就係導演編劇如何看澳門 - 徐欣羨搵梁詠琪廖子妤余香凝，她們係香港人但都講廣東話，和澳門人沒啥分別。白百何呢，由頭到尾都係煲冬瓜，那就唔好意思了。