《黃金兄弟》 - 話叫你兄弟，實當你契弟

你問錢嘉樂做乜膠要拍《黃金兄弟》 (Golden Job)？係基於愛定責任？其實搵哂鄭伊健陳小春謝天華林曉峰，再叫埋劉偉強來客串已經畫公仔畫出腸：向《古惑仔1人在江湖》致敬呀X你個X！呢係好聽的講法。

只係沒有朱永棠，亦沒叫吳鎮宇出來做o靚坤。曾志偉的阿爸也就係大佬B，五兄弟裡最後也要死一個，也是講人到某位置身不由己的無奈。話雖人到五十又去到匈牙利日本同黑山，仲邊會扮乜野古惑佬當街攞水喉通開山刀咁低檔，所以又飛車又一堆軍火槍林彈雨大爆炸，好笑的係就算這樣你都感唔到有大漸男兒血氣方剛：原因係唔駛飛車開火時對白太多，連「記得要著避彈衣」如此廢話都要講埋一份，搞到似是班披著男兒身的八婆；謝天華哭哭啼啼又躁狂，曾志偉唔俾你做大佬明顯就唔係你心術不正，你彈我性別歧視都要這樣舉 - 女人渣車等於公路炸彈沒聽過？

所謂好聽講係向《古惑仔》致敬，為非作歹的黑道世界有乜好致意？引人入局就係「兄弟」，以前困死陳浩南在洪興就係這兩字。今日錢仲要驚死你唔明，重播《友情歲月》之餘再係咁講做兄弟有今生冇來世。只係錢唔似在賣弄，而實係戲謔「兄弟」：唔講謝天華的被迫害妄想症，陳小春誤射「阿爸」、搞到鄭伊健要獨自頂罪，四人之後可以再冇芥蒂？劇本根本單薄，卻可以一句：「有今生無來世兄弟嘛，做乜要斤斤計較？」來霸王硬上弓般掩蓋。

或係錢嘉樂的另一種好意：《古惑仔》至今廿年，世間以甚麼情誼作名目的搵笨案件太多，於是拍種另類警惕片告誡世人 - 係咁講有今生冇來世又點，桃園三結義嚷但願同年同月同日死也只是口講，五兄弟最後咪又一定要死一個；單薄玩爛「兄弟情」，也就是所謂叫你做兄弟，實則當鳩你契弟。錢就此提你：勿叫兄弟綁架你。