《L風暴》- 搞乜L

林德祿的「陰陽廉系列」來到L，已有人戲稱不如叫「搞乜L風暴」，或者小弟起名會叫「瘟室瘋暴」，《瘟室》者，為神級爛片《The room》的香港譯名。就算之前沒有領教兩套，但你看到海報再閱畢內容大綱，你都會猜到這片會是甚麼回事。

《L風暴》 (L Storm) 一開始已犯下會拍爛電影之錯，就係單想到甚麼會吸引觀眾的，都有理冇理塞入戲裡：以為槍林彈雨追逐會令觀眾興奮，但卻忘記老廉是甚麼：就算可揸槍，也始終係文官，要開槍還不如叫警察支援，他們要做的係和罪犯鬥智，但老廉有咩智？拉左一個古天樂就廢左，一個鄧麗欣又已把其玩轉，一餅錄音又可唔使再查還人清白。唔怪得那麼多追逐槍林彈雨，其實就係掩飾內容的空洞。

一子錯滿盤皆落索，Tommy Wiseau的神導技，林德祿都一一用上：對白幾全咬文嚼字，尤其係「陸sir係無辜的。」重覆又重覆像「Johnny is my best friend.」；許多畫面明明可以腦補卻要畫公仔畫出腸；成套連小角色都用上廖啟智盧海鵬張繼聰，但俾面安排戲份卻搞到如《The room》裡不明角色彈出彈入；更不要說如在海關大樓上你睇我唔到般監視海關等一批弱智鬥弱智手法了。

你問《L風暴》會否成新一代「神片」？這還欠一些「神因」，既沒「天機」那種拿一舊屎鑲金的氣概，又欠《The room》那自以為是的純真，其實林還有一點天真，以為老廉就係賣點就想玩夠廿六集，但連貪五千萬的前特首都動唔到的老廉會係賣點，真會叫人問句：「冇L野嘛？」