《失戀日》 - 你尋我開心，我尋你開心，我們還有甚麼可以恨？

葉念琛或都想搵次機會大講一次女人，大概唔敢跟高達叫《女人就是女人》，想唔到片名就唯有是但叫《失戀日》 (L for Love L for Lies too)  - 認真計較甚麼失戀會傳染，你一定會輸。

整套戲完全女人大哂，男人都係企埋一邊。但早講過別以為葉係會討好女人的狗公，反之話之你係劍橋出身的香港小姐，葉也可以叫你完全崩壞在人前；就連淡定開的鮑起靜都要玩到神經質，竟然搞到莊思敏到盧覓雪兩大極品對比下已顯得沒咁難頂。另邊廂葉係有點情義，拍檔多年的鄧麗欣，唔駛如麥明詩搲爛塊面，以前做開阿寶，今次也做返阿寶就夠，或者正因佢演技就只有這麼多。

唔係張繼聰的老千令套戲變返好玩一點，電影還真會叫男觀眾的你非常厭惡：鮑起靜發神經綑綁老公石修，麥明詩也神經病地杞人憂天，最叫人反胃係金燕玲 - 三次與阿寶的母女對話：頭兩次勢利眼光數算女兒，數算其男友不外如是，最尾次金回首過去，自己也差點被重男輕女母親賣作填房，寧被母親看不起也到夜總會賣唱，才發現與阿寶還真係認真愛固執的兩母女。金燕玲港母的惡俗勢利意識，建基於長年被他人睇低，不曉自重反倒尋找機會報復性地再睇低他人，即是奴才但求下面還有奴才。最尾次賣親情想勾你眼淚的一幕，睇真D也是想你同情這種悲劣的意識，可恥非常。

你會嫌葉念琛講女人也講得唔夠公允，咁唔係失戀那葉究竟想談甚麼，英文片名有句L for lies - 你欺我詐本來係葉的拿手戲，只係這次會否講甚麼大道理？劉浩龍同張繼聰，同樣都玩透阿寶，但阿寶卻受落張而最後報復劉。阿寶初遇張等玩弄氣得要報警，張反窒一句：「你有損失咩？」問題不在於是不是欺騙，而係阿寶快唔快樂。張會逗得人歡喜但劉卻令阿寶痛苦，正如香港，若港人見到前程滿希望，中共明目張膽插手香港，還會有誰有所謂？弊在現在港人皆前路無望，於是就怪責中共違背中國兩制，那就謀求港獨自立，正如阿寶最後逃婚玩了劉一獲甘。

常人都話葉念琛會教壞人，睇怕今次都不例外。其實就算沒有葉，十幾年前趙學而的歌都教過你：「你尋我開心，我尋你開心，我們還有甚麼可以恨？」十多年過去，人始終唔會學懂，難怪這個女主角，又係叫阿寶，對，我講梗揸高達o個個。