《暗色天堂》 - 罪與罰

原本，大家會俾面這個新手導演袁劍偉的理由好簡單：就算林嘉欣已為人妻，她的甜笑仍係世界級，無得輸，男觀眾注定要乖乖奉上票錢。否則，就只「有一段關係叫張學友和林嘉欣」，唔見得叫觀眾盲目地撲入戲院。尤其《暗色天堂》 (Heaven In The Dark) 單看內容大綱，已叫人很大疑慮。

電影簡單概括只有三點：法吻 (又叫茄輪)、身敗名裂、真相揭開。唔係為看林嘉欣，大家期待還是到最後：為何一個女人會因為一個茄輪會把一個男人毁滅？所謂謊言、零碎的記憶，即是茄輪前後，男人杜天明和女人Michelle還做過甚麼？最難搞在這裡，講得太薄弱，輕則全場大噓無料到，重則尤如多年前譚真一：「我相信以你性格，娶個老婆一定好靚。」到時如何令人跪到在石榴裙下的女神都會立即崩壞。

Michelle控告杜天明非禮，若係爭辯你把舌放入我口我卻用牙齒頂住云云，當然幼稚到無眼睇。真相係茄輪之後，杜反指Michelle係撒旦來引誘他的蘋果，係「雞」。「雞」這句話，男觀眾仍會覺得：「嘩，咁就要告人，駛唔駛呀？」而對女觀眾，杜天明已係該死有餘。其實到最後，電影還在爭論，到底有冇人真係有罪？

法律眼中，杜天明或許係無辜，但在上帝眼中，杜卻真係有罪：罪名正是狂莽自大，他自言就快可以做陳馮富真做潘基文，他是牧師，卻忘記了如約瑟都唔敢自誇解夢的能力，上帝也就是借Michelle向他施罰；Michelle都唔係無辜，她的罪係妒嫉，得唔到反遭侮辱因而陷害杜，她毀了別人同樣也毀了自己，即使投入宗教卻也得不到快樂，這也是上帝對她的處罰。

這就唔止係罪，罰都係要問：一下子把杜由天堂趕到地獄，罰得會否過重？講身敗名裂，對杜還是否真係把他趕至地獄？杜轉做生意佬，因而享盡各種酒色財氣，話他自暴自棄，還不如說是重新認識自己：正如《投奔怒海》裡的阮主任 - 越南人革命成功，他才發現自己其實好色好酒好貨，感慨自己的革命失敗已太遲。要比杜其實還很幸運，他可以做返「真我」，仲唔駛死的。

奈何他五年過後，仍係妄想做聖人，仍在怨恨Michelle阻斷了他當聖人的路，諷刺的他沒有理解到，聖人不是那麼容易就當到：舊約裡約瑟、約伯到約拿，捱過多重試煉，也只係得到立傳。能成聖就只有耶穌，聖子就只得一位，卻從來很多人硬膠膠想做上帝第二個獨生子。假如硬膠也是一種罪，那罰就係沉淪到底不能自拔，還要你自己自招，無得怨。