《PG戀愛指引》 - 三批老女人

葉念琛要提拔當然就唔止提一個黃柏基，還可以提多一個蔡潔靈，首作叫《PG戀愛指引》 (PG LOVE) 。講真，葉真係要給機後輩，還不如只退守監製，但他就要編劇也攬埋，大問題就係明明導演未老，他卻早就老了，卻懵然不知道。

又係導演唔打住蔡，還會依舊係葉，仲要以為係幾年前的倉底貨：晴晴、Sugar或Candy、鳳姐互不相干，三批各有故事，像故事集拼貼一起。主題卻係顯然易見的一致 - 港女們你欺我詐。雖然我早就說這個旺角活地阿倫係新現實主義大師，現實那些始終都係狗改不了吃屎，只係欺詐的細節你還真係橋唔怕舊唔知醜 - Vincent扮金融才俊扮洩露股票內幕引Sugar及Candy托市、二世祖們在夜場夾做落藥大龍鳳藉此扮正當好男人食純情少女晴晴隻豬，陷巴爛都係同千年蟲寶藥黨一時期之招數；唔詐就做過純情好男人，Happy哥又係純到幾十年都係會攞錯人o地份醫療報告以為自己生Cancer，唔死得開心都係話要揹鳳姐落山，《紀念日》方力申已經揹過鄧麗欣啦，莊思敏就不如一腳踢佢落山俾D新意啦。

要認真，蔡潔靈其實可以把焦點集中三批女人上，藉此去道盡港女的面相：莊思敏的鳳姐係三批女中最突出，也最反映到現實中某一代人 - 她曾經風光過、落泊過、過一陣子才會醒覺重新振作。她常說當年一晚賣千支啤酒幾多裙下之臣，如同時下某代人常說想當年，她怨恨被舊男友利用出賣，也像今日某些人只懂怨恨香港點解變成咁，她自暴自棄只以為一無所有，其實她還攞有個真心待她的人卻不知道。正如我們沒有錢，但仍有自由，這不是甚麼雖然你飲左鉛水但好過七億地球人連口似樣的水都無得飲，而係勉勵既然去怨為何不如當年，還不如珍惜現在還有的，再逆流而上。

莊思敏做老中女還真係做到，岑日珈 (晴晴) 或曾淑雅 (Sugar) 和崔碧珈 (Candy) 只需做回自己，卻又做到老了幾十歲：Sugar同Candy仲「後生一點」，現實廿多歲的港女都係貪錢貪飛上技頭變鳳凰，但如前言又係想欺人怎料卻被人用廿年前的舊招反詐，那就別怪我看你的年齡加多二十變四十；晴晴最老土，又係純情家困落夜場驚俾條仔罵之少女，遇到二世祖差點以為自己會變灰姑娘，事實係老舍故事《月牙兒》之變奏，差在少女最後醒悟過來回好男友身邊。這個少女「實際」又多少歲，睇返《月牙兒》的創作年份，都唔好意思去計。

講真，成套戲交俾莊思敏由頭到尾，都冇咩所謂，反正三批女人，「年紀」都一樣「老邁」。或者你會自認膚淺，你就要只看年輕的樣貌及身軀。Ok you win，但既然如此何不只出寫真集？葉念琛攬得太多卻只用舊橋根本係靠害：幾個青春年華o靚模慘變幾十歲老中女、新手上路蔡潔靈會被認定係另一個江郎才盡的葉念琛，某強國觀眾看到如此老土騙術，又會訕笑我們只懂懷舊不思進取了。