《鴨王 2》 - 文凱玲，你太年輕了，你以為在王晶電影露下就可上位嗎？

其實，小弟從來不會抵制誰的電影，就算王晶無道，小弟也要公道，不能未審先判連戲都未看就叫定大家飛都慳返。若然，真的要戲都費時睇杯葛，還應該給個更合理的理由，《鴨王 2》 (The Gigolo 2) 換了個導演叫姜國民，他的上一套就係真係會叫人撕爛戲票的《撕票風雲》。

《鴨王》當然就係講鴨，區焯文起碼叫何浩文由頭帶到落尾，去到姜國民的2，何側似變了個陪襯，從頭到尾轉做文凱玲，電影轉為一套雞后育成之路，幾近離題。雖然我都明白，王晶在香港已變過街老鼠，若要繼續在其旗下搵食，那好趁現在能出多次就出多幾次鏡，反正下次點出，只要掛著王晶牌頭，都唔會有人看你一眼。

但文凱玲又能否把握這最後機會？你話她還算拼命，多場全裸上身。Come on，唔好怪我得罪講句，在這年代，女星的身體已不是能昂貴得能掩蓋一切。《一路向西》的王李丹妮，像露兩個大肉球，還要扮蛇做波推。咁文又做左D乜，和何浩文的對手戲，只係一場女上男下，「老師」何巨峰卻欣然俾了個A+，俾得像「派grade工廠」咁樣俾。

講返故事，文凱玲的Monica事業不外如是，家有患病母親，情場卻遇賤男，於是把心一橫，踏上做雞之路。這種賣悲情故事聽多到嘔，Monica為好友復仇及最後巨峰之死，亂入到似無戲搵戲做。最叫人無癮的或是姜，又還是王晶，到了三級片還只敢踏界唔敢去盡，不敢起個「雞后」叫電影明正言順點也算。Monica做雞最後也只求同何結婚，想才子佳人終成眷屬埋尾算，而唔係順勢做個吃盡天下男人的妖后，已沒有第一集：「怯就輸一世。」的豪情氣慨，怯懦老土到悶死人。

王晶還真唔駛叫人杯葛佢，就算你話王只係信錯個沒啥導技的姜國民，但就算王親自操刀，卻唔見得玩到比誰更放 - 全投大陸的他，露一下玉背賣一下香艷就已到極限。文凱玲要上位，不止要露，還要做蛇蠍美人，但無論《一路向西》的王李丹妮，還是《四非》的李悅彤，均做得比她更稱職，那兩套都係道地港產。文要拼命，不如先換過不靠大陸的錢，會放膽把她身體發揮極至的香港靠山罷。