《獵金．遊戲》- 毫不叫人興奮的浪費

 

劉德華又北上搵銀，大概見怪太多總覺會有伏，唔係「天機」的唔係做乜撚就係《潛行》的狂燥「你奈得我何？」。《獵金．遊戲》(A Gilded Game) 意外似「正常」，你話有邱禮濤叫劉華唔會玩出膠，但須知邱又唔係未玩爛過。

 

事實全電影主幹在歐豪，係講一個叫高寒的小伙之投資銀行成長故事，其實就係杜琪峰《華麗上班族》。這高又如初生之犢般戇直都算，但見劉華扮的老手張托德竟一本正經道到最後說要規矩做人，再睇返海報連預告，心諗似會錯意：唔係劉華去扮大鱷呃鳩人錢？ 

 

邱有時太無趣在太非黑即白，尤其金融世界實水清則無魚，他卻妄想出於泥如不染：若食老富婆太重口味而揀食狗糧我也可諒解，大惑不解的是你給女老頂食著，寄返你屋企俾你女友睇到竟唔係閃卡激戰片，而竟只係一張酒店收據，咁就激撚到條女嚷你變了揚長而去 - 拜託大學生也懂Come on James了，怎麼投行社會歷練完心智還像個初中生？ 

 

有人話電影走向結局一開頭就知，或啱一半半：只要你難以置信邱禮濤竟真正經到J圖也唔俾你張。既然你早知正義必勝，難怪電影毫不令你興奮。劉德華似拍了很多簡直叫浪費的戲：「天機」係痴撚線地在屎上鍍金；《獵金．遊戲》則是原可奉旨金光閃閃，但營造故事人物毫不亮眼，鋪幾多金也是白費。你話小弟言差矣，亦舉出個不正常：後部劉華等玩操控股價簡直暴走，說港交所根本唔會俾你咁玩。但你又別看漏邱禮濤不斷打字幕強調這地叫「中国香港」：係個原你輸梗也可用「完善制度」去「反敗為勝」之地。故你再問劉華，這次他或會輕挑咁回：「你奈得我何咩？」。