《送院途中》- 點解要救唔講清楚叫我點救？

 

《送院途中》（Vital Signs）遭未上先諷，眾多嘲話二零二一拍畢，上年電影節首映後到依家先插到檔期，唔駛問實係套戲有問題。某程度卓韻芝也是抵死，早年《爆3俏嬌娃》唔係玩爛到狗也搖頭，還真莫怪現在通街都對她先入為主。 

 

當然小弟還是「公道開」，點都係睇過戲才論：開頭望古天樂老戲骨咪就件老屎忽，與年少氣盛的游學修，也就係個被歲月磨蝕的與橫衝直撞擦出矛盾，你以為頂多只係如此。未察覺游有點唔對路：究竟係博升職世界仔還是戇直青年搞唔清。袁澧林笑他外號「極速先峰」他還似懂非懂，要扮到咁戇居還真夠辛苦。古著游拍下拖來撮合他和袁 - 甚麼年代又玩雞仔媒人？ 

 

兩個大男人主幹，但仍一份好八婆的劇本：上部還好地地講救護，中部就跳到古仔同佢個女，游肉緊爆向古仔話佢個女唔開心 - 唯八婆先超過清官理人家庭事，重緊要得過去救人；轉為游見古屈服向學校校長道歉及爭做活動人博升職，嬲爆他沒有原則 - 其實這老屎忽不嬲如此「靈活」你第一日知？接著游就「自暴自棄」推開送上來的袁之後又拍返過去 - 其實卓有冇同游傾清楚要演活一個點樣的男人？睇見游咁中二病發還真愈睇愈忟。 

 

當你係卓粉諗到一絲辯解：好歹主題就係明確：救護員日常救人，放工後見大家也爭著移民，為何卻沒講，就像救護接案也不是一開始就清楚情況，但你係調轉頭一走了之還是硬著頭皮去救？卓似想你係後者，卻叫人奔向災場，古忘我地做心外壓，游卻知悉面前傷者早已沒心跳做來無謂喝停了古 - 擰頭卻又話反正死定不如慳返淡氣，咁你係咪玩嘢啫？

 

最後重要響起葉蒨文的《珍重》，這首也被賈樟柯用在《山河故人》：歌響起時女人留在太原男人遠走各處，也就是縱在兩地一生也等你。現在聽上來卻是你留在救港我自己鬆就好，搵笨味濃。其實你追問卓韻芝為何要救港，她也唔敢講清楚，仲叫你不如當佢冇講過。Ok fine，但還真同情游學修搞到咁樣樣，見這左搖右擺的劇本，我大抵連演男人定女人好都未搞得清。