《危機航線》- 人有多大膽，戲有多大爛

 

好耐沒睇過彭順，亦唔知那時開始他的胃口大了這麼多。 

 

或者鬥大未必全是他意思，正如劉德華也嚷有個特工夢，湯告魯斯做過乜佢都跟，湯佬喺《戀戰特務王》（Knight and Day）玩過機上大博鬥再揸埋機剷落森林，就叫彭照辦再擴大搞起這《危機航線》（High Forces）。覺得我的国總要厲害過美國佬，湯佬都可以捉住機翼隨機而起，我劉華有乜奶油唔撚得，於是就有了五千尺高空上徒手拉著傘繩、腳踢開飛機起落架的「精彩場面」，So？「人有多大膽」我国傳統嘛：彭或會如此解。 

 

若說電影真係為劉華度身而造，可見於正反兩方都有著躁狂：現實或某人似有著，可見於《潛行》的聲嘶力竭「你奈得我何！？」同樣可見電影時而急燥：就叫空姐拿拿聲信佢係間航空公司保安，跟住著她引三個恐怖份子過來，點做唔駛舖排，因為劉華耍帥係重點，你個小空姐有甚麼美色運身解數（好似）無人想理。 

某同行質疑劫機理由很多，邊有人為錢搞咁大鑊。但須知唔為錢的劫機，一為政治、二為宗教理念，歷史上幹這些都為某黨國際友人，你叫彭順怎寫才好？小弟係文科人，物理嘢我不太懂；但亦如究竟由東南亞那國飛入中國境內會碰唔著機場，要找條市區內的公路上降落，還要唔疏散沿路居民由得佢哋食花生 - 戲裡公安做嘢還是淡定如十年前的「一切盡在掌握之中」。 

 

彭順北上已久，原來已把我国精神融會貫通：人有多大膽，就係女鬼會懷孕，更莫講區區物理。其實劉華定彭順要能取悅觀眾，似乎只能寄望觀眾夠單純。問題係除非父母皆白養希望工程皆白幹，否則似愈來愈多觀眾不賣他的帳。當然叫觀眾瘋狂大笑也是取悅一種，或劉華正如《小丑》在告訴大家「這就是娛樂」。