《窄路微塵》- 塵就係塵，何需正名自己叫塵

 

香港講窮人的電影，往往都偏差在太「做戲」，你彈係廢話：又唔係紀錄片點會唔係做戲。我意思係你開拍時或以為俾錢入戲院係有錢人專利，忽略了就係窮撚都會幾百幾千地賭馬買六合彩，駛幾十睇個早場又有咩出奇？真正窮人入戲院，睇到如《窄路微塵》 (The Narrow Road) - 袁澧林往光鮮劏房或賓館時或不禁窒句：「你呢D叫窮？ 」

 

最尾一幕轉做保安的張繼聰，彈同事只圍封嘔吐物就算，忍不住當場清潔。真做保安或物管的會彈其根本越祖代庖 – 同事圍封好確保現場安全後交給清潔處理才是正確做法。你話張只因為專業才會按耐不住，既然專業那就算老闆做唔成，都可以改當清潔科文，點解只想到做保安？想到就係林森做功課做唔足。 

 

這套似《阿索的故事》：更甚係那套起碼真小人擺明借揸巴士過橋，這套卻似偽君子地扮專講清潔，口吻卻似嫌棄這職業：開頭張在店舖內噴完霧後，上車休息時嘆氣，像怨自己為甚麼要幹這行；袁開頭也嘻嘻哈哈，後來才會認真，但最後也寧願賣珍珠奶茶也唔再碰清潔；再講你工作時任由小孩在旁玩樂，甚至玩埋一份 - 你都係唔認真看待這工作。 

 

窮往往只係個相對概念 – 覺得唔夠充裕就係窮，且窮人也可樂天知命敬業樂業，這套卻係硬要窮人自認係塵，覺得係社會錯唔理佢地，故此偷竊還可反罵有人囤積居奇才迫使她如此，叫人睇唔順係你自暴自棄，還老奉覺得社會應體諒你。 

 

就係張繼聰到後都愈叫人唔順：明明毒撚坐在角落獨自打飛機，你卻特登一杯水潑埋去自以為保護人，還要數算網巴品流複雜 - 你唔係話自己只係粒塵？還好意思挑剔身邊來自以為很英雄？其實塵係全世界都有，東京有 (《東京夜空最深藍》)、深圳都有 (《路過未來》)，只係香港才會強調自己係粒塵。就當用意想觀眾同情你，問題係起碼小弟就不能同情你起來，只因知道可憐人另有可恨處，恨在你係咁話自己係塵。