《飯戲攻心》- 舞女兒子最契弟

 

你問《飯戲攻心》（Table For Six）這套改中秋上的賀歲片有沒隱喻？其實最唔駛問的係陳詠燊，佢一定唔會認係有：国安法下講錯野都後果嚴重是其次，最重要係既然「隱」，一早揭開就實冇左個「隱」。畢竟世間的隱喻都係觀眾發掘出來，明冇？

 

或換個問法：就當陳想你們想到甚麼？表面睇係食色性也 - 性就只係一條床片；色係林明禎贏通街，搞到張繼聰陳湛文冇人理、鄧麗欣王菀之當然比下去、就黃子華都沒她那麼高期待值；重點都還在食，這似武正晴的《擂台物語》：頭餐打邊爐、再一餐搞甚麼豬扮羊牛扮豬苦瓜啫哩、轉個餐就係六國大封相冇人理食乜、最後係聚精會神燒出難食的叉燒 - 喻都係這張飯桌的合離，陳似說其實大家都係飲食男女，極其只係打機當大志爭女當大事，所謂有甚麼意思，都係你自己諗多而已。

 

你還以為只是這麼多就好戲在後頭：廖子妤扮的母親出現子華夢中，子華問她還記得當年有否講過樓在家在？廖笑道：「你阿媽做夜總會架。」自嘲佢講既都好信，早幾年子華或衝口而出道：「唔係呀，你起碼可信過共產黨，倪匡講既。」之前就為著應否賣樓而反轉成家，最後一家笑吃完一餐各走各路：陳似說人的毛病係往往都依賴別人告訴你該做甚麼，但自己的路始終要自己決定。像今天的去或留，只要對得住自己，何需怕對唔住別人？

 

更好戲在彩蛋：黃子華的《毒舌大狀》預告 - 聽到「我最契弟」這句《逆流大叔》裡的做人道理，你還以為這真只是廣告？拼落「你阿媽做夜總會」度，你才發覺綑綁港人的緊箍咒唔止国安大法，更重要係如「阿媽講落樓在家在」，冒味服從的意識。當你知你阿媽做舞女，你才醒悟佢說話只係山草藥，你才會學懂做過如孫悟空的契弟。

 

當然，你去問陳詠燊，佢實會話只係執《變色龍》口水尾，甚麼都係你想多。