《一路瞳行》- 負負得正

 

《一路瞳行》（Sunshine Of My Life）係朱鳳嫻的自說自話，但亦可謂負負得正的嘗試。 

  

片長只九十六分鐘，但你或時不時唔耐煩看錶，先因朱係日記式敘事，你見到一家哭著相擁以為可起身走人時卻係仲有排先到終點。相對如《媽媽的神奇小子》還會問為甚麼或之後又如何，《一》旨在分享我的成長和我的父母， 「我全家都好幸福喎。」唔理係咪騙案，你講得呢句就等如話只是這麼多。

 

朱唔主動去問，卻係靠電影裡的問題帶出問題：唔計你因偏見而寸吳千語年近三十仲會扮學生妹，吳岱融惠英紅就真係做足老豆老母十幾年 - 外貌年齡唔對實時。這卻帶出戲裡母女間糾結何在：母親把十七歲女兒當係七歲細路約束，到後部女兒又忽視父母做左幾十年人的事實，驚佢地如小孩無法自理 - 父母兒女互相看待往往就如人與寵物，只係人就係人唔係畜生，要搵理由去唔信任你就只好錯配年齡，話你仲細。這是講長幼有序講得虛偽講到病。

 

你問點解要針對吳千語，講真她早在《青春鬥》做起煩膠大小姐時係叫人無理由會喜歡上，佢其實一直剛硬至這套，只係到《王家欣》才令人對佢改觀。來到這套，佢碰著係更煩的控制狂惠英紅，人們才醒悟佢始終真演活了一件港女：表面橫蠻卻又直率，反叛過後會倦鳥知返，追星卻就係重情。

 

但你埋怨被母親綁架，嚷說要自由，卻因為你重感情於是自綁，多麼諷刺。自由與感情是否魚與熊掌？西川美和《漫長的藉口》裡人夫死老婆得「自由」，膚淺的你會責他一滴眼淚都唔流沒感情；朱鳳嫻現在自由人，都要戲尾出字懷念父親，唔否定真心，但都可能係專登畫出腸喊濕兩包紙巾。其實「別擔心，你離開後我也會好過來」就會自由和感情兼得。朱頂多只係半懂，當然你或會話這比那個四十多歲牛高馬大仲係度阿媽阿媽的還好了。