還記得是枝裕和的《誰調換了我的父親》嗎？故事交給艾慕杜華，就變做《誰和誰共母》(Parallel Mothers)：除了主角變做女人即老母，講得也似更集中簡單，但最後你或覺有畫蛇添足。
簡單先係把家庭再壓縮：是枝認為家庭梗係父親母親兒子三位一體缺一不可，艾卻嚷男人唔係乘亂偷姦就係偷食人夫 - 皆蛋散所以老豆此角提來無謂；調轉嬰兒其實最大責任在醫院，是枝嚷梗要追究，於是又接連到一個護士再到另一頭家。艾卻係叫Janis抽過口水傳過去份報告返來話點就點，竟沒諗過帶個女返醫院打爛沙盤問到篤。重要聽到自己親生女掛掉竟只傷心認命，連起碼揪起人家衣領質問都沒做，大量到有膠味。還好Ana知道被瞞騙會有一絲憤怒。
艾慕杜華推崇母親，所以戲裡做人母的都叫她們盡正派，唔止講緊妳年少任性或只顧事業，但妳看到自己女兒總會知愧疚。尤甚聽到Ana係因姦成孕，自不然想到Janis親女的死或唔係意外，但唔止Janis沒追問，電影到最後亦直情沒跟進 - 艾眼中就係沒毒母。當然你或窒這其實係艾懶惰趕收工，正如《聖·教·慾》
(Bad Education) 結局直情一堆字幕來交差，只係今次埋尾有返D「誠意」。
就係開頭Janis提其太公輩在西班牙內戰中疑被長槍黨殺害失蹤，結尾就係尋回其屍首。你或覺得滑稽：只聽過講還講唔好攞人老母來講，艾唔止講老母，重要夾埋長槍黨落去，似九唔搭八。若你係艾粉絲就幫佢辯：法西斯長槍黨濫殺平民，就如男人偷食或老強她人一樣可恥。但別忘記，那偷食妳的男人，最後還是他幫妳尋回先祖父輩，而妳又會再懷上一次他的孩子。只數男人不是，實也太唔公道。
沒有留言:
張貼留言