《G風暴》- 我想飲咖啡，你俾杯紅酒溝杯麵我做乜鳩？

 

「陰陽廉」竟未玩盡廿六個英文字母就要到大結局，即使你冇留意開銅鑼灣電車總站對面間戲院外牆廣告，睇到戲裡仲有廖啟智，你就知這結局係通街都費時理咁擺左倉底一兩年。當然係咪真ending都係講下啫，古天樂拉柴都未必真終局，係追開「陰陽廉」都知如陳靜都唔係一開始就做定張繼聰隔離個件。 

 

講真要以「陰陽廉」來向個對香港一曉不通的老外來解釋老廉是甚麼來的，肯定愈講你都會唔知自己講緊乜：到《G風暴》（G Storm）  終於都忍唔住自嘲：「ICAC其實文職來的，又著避彈衣又揸槍又盛，007咩。」但張智霖講嘢未必最貼，要更貼切來形容這套，可謂謝天華的快撈波士拿鮑魚搭杯麵，仲要將紅酒倒落麵度食。 

 

一直奇怪林德祿係老行尊而唔係新手上路，重要搞「陰陽廉」前係拍開《廉政先鋒》，但每每講老廉做野手法，都如《S》：「ICAC查案不便透露。」；入境海關到宣萱的女法官點收賄包庇，甚至那是那國家甚麼法官來都唔使講清楚你聽  -  就係一味吹水，沒樣依據實情，既然拍開就點解寫唔返個現實的老廉？ 

 

點解話呢套係紅酒溝杯麵？因為唔講正題，卻將大堆無關痛癢堆砌落去：你要做007都算，阿夏嫣（定盛君？）似單戀古仔，卻竟搵張繼聰傾點教古仔玩交友app搵女，又如張同陳靜拉古賀生日同睇精神科醫生 – 喂搵戲做都唔係咁九唔搭八法嘛？最痴線係你明知演講有高恐襲風險，竟安排在露天舉行，當觀眾唔知咩係狙擊手。走佬重要好走唔走偏走入死角太空館，更唔好講玩咁大鑊差佬咁耐都唔來多支援，或者你斗膽想諷刺甚麼，雖然片頭拍著831這相反意思之車牌。 

 

可能林德祿還真有心人，已預知現實的老廉就只顧捉叫投白票，等如謝天華最後無厘頭死一鳩爛。其實你莫怪林連杯正常的咖啡都沖唔到出來，因為好歹紅酒是真的話，話紅酒溝杯麵已最客氣來形容現在老廉。或者「陰陽廉」現在終局就好，因勉強搞下去，大概都係搞埋比紅酒杯麵更不堪的出來。