《無間行者之生死潛行》- 餿左冷飯再翻炒點都唔會好食

 

香港人所謂的窮則變則通，去郊野公園離島都可當遠赴外國遊歷，自然或只放在電視的也會放上大銀幕充撐。但難得入戲院都唔係叫你係戲都不假思索買票，正如《無間行者之生死潛行》(The Infernal Walker) (黃家輝導)，一聽戲名總要問自己買來做乜鳩。

 

睇內容同演員陣容，都知實係《無間道》、「LaughingGor」、《使徒行者》三樣撈埋：當「LaughingGor」已十周年，《無間道》卻還未夠廿年，話致敬都太夾硬來。重要係你係真致敬就唔該有返D花思，唔好上半又係警察黑幫販毒鬥法如此搬字過紙，並且兩邊都鬥得低能如玩泥沙。重要係你捉到陳啟泰都唔識脫角 - 不如你索性叫佢分身哂所有角色，反正《使徒》就係臥底臥底乜人都臥底。

 

你會問小弟其實一早知「LaughingGor」《使徒行者》都係執《無間道》口水尾開，為何今日卻會對這套咁大怨言。就係上兩套「LaughingGor」電影版好歹還是左仔邱禮濤，還會借喻香港人「內外不是人」；《使徒行者》好歹都預言到你玩哂真無癮；今套可能就知現實已經夠爛，所以無論謝天華還是周柏豪定係陳啟泰，都係為臥而臥為隊而隊不求甚解。仲要現實警察會偷毒品攞出來賣，戲裡仍會捉人販毒的先會被人覺得正常到唔實際。

 

總之《無間行者之生死潛行》簡直係幾舊冷飯已經生餿重要夾硬再炒，本來就係你食埋我個份。當然你或會辯護係黃家輝唔想再講多，「LaughingGor」和《使徒行者》就係講中香港的境地，所以現在只炒冷飯就算了，我也唔想知還會再壞到如何了。或者要炒還不如叫王晶出來拍「無間斷之悲歡離合大狂魔決戰彌敦道」，雖然我覺得倒轉頭要人笑都係未必笑得出。