《生前約死後》 - 一個戀母成狂的馬淩偉

我根本不喜馬淩偉，只是出筆恥笑總要看過戲先。入院前略看過別人的評，知道只要笑就可以，的確電影本身令你大笑沒難度，難在看的是早場，要在一群年過半百的觀眾前開懷大笑係很是為難，只係沒聽到後面有馬尿之聲，慶幸自己在他人眼中還不會是冷血之人。 

老實說《生前約死後》 (Till We Meet Again) 根本不值得叫人花錢買票入場坐定定，要播就在TVB裡播就可：馬明顯用返拍肥皂劇的手段來拍電影，於是對白仲要廢話特多：開頭介紹自己同老豆老母，喂依家叫你返十幾年前拍《公私戀事多》呀？最搞笑係余香凝扮的醫生窒佢：「……因為阿媽過身而搞到咁，我真係體會唔到。」這句似公然串觀眾：「其實你知唔知究竟睇緊乜？」 

你會發覺余比《逆流大叔》時更口黑面黑，無他，相較只係被搵笨的不生性的，面前這個姓馬的大叔竟仲難頂得過佢地：細個已經開口埋口點都要同阿媽一齊，大個仲真係無左阿媽唔得搞到精神分裂玩跳樓，已經唔只係媽寶，簡直係戀母成狂。要計較係余竟仲可以睇佢到底：一個「心理正常」的年輕貌美女醫生，即使見慣世面，但見到如此核突，都會調轉頭拋句：「你沒救了，我放棄治療了。」避之則吉。 

你或會罵小弟無視親情真係冷血動物，看來你唔記得香港人聽鄰國成日自認做你阿媽已經聽到厭，你入戲院或逃避一下現實，但竟還受落一個行年四十的男人仲阿媽前阿媽後，看來要看醫生的才是你。記起西川美和《漫長的藉口》：人夫死老婆，千夫指其一摘眼淚也不流，但又如何，反正我會好過來 – 這才是重點。《生前約死後》卻流露一個沒阿媽就唔會好過來的男人，幸好我們看後還識笑，若然係大班人流馬尿，換轉會笑那個是中共。