《天氣之子》 - 「為何中學生不應談戀愛？」

近年的新海誠愈會吸引人，手法係由現實出發，逐漸踏入其幻想世界。《天氣之子》 (Weathering with You) 更要留意，其起點係東京。

東京是甚麼？石井裕也等早就講過：人多如螻蟻，正因多你一個唔多少你一個唔少，人際間相應冷漠；人本身亦有劣根性，見你似好欺負就借勢壓迫你 - 帆高和陽菜都係未滿十八，結果一係求職處處碰壁，警察社工追殺他們，似想要把他倆趕離；就算難得好心人幫助，好心人也不會夠慷慨，要幫他作廉價奴工。總之東京對少年來說，就是一座吃人的怪物。

但少年就係單純善良：眼見風暴來襲，也想要獻身解救東京。如同十多年前彭浩翔《AV》裡講的：「我們會以為我們對世界很重要.......」東京裡的成年人都會如此想：「獻一個人就能改變天氣，相信大家都會同意。」但其實又係成人搵少年笨。就算水淹東京，東京也照常運行，成人能夠狡猾，就係其夠靈活變通，唔駛你這少不更事的擔心，也就是：「.....其實世界正準備原諒我們的幼稚。」

要數電影最令人動容的，是帆高去解救陽菜那時：「唔好理明日是否傾盆大雨了，我只想和你在一起！」少年終明白到，所謂大愛根本唔係愛，只係你去同情大家而要你去犧牲你的唯一。愛係要講自私，你給夠愛身邊人才好去愛其他人。感欣的係，少年終於都學曉成長。儘管係歲數未及，還要忍受成人的壓制。

以前中學作文常有這條老土題目：「中學生應否談戀愛？」其實答案係既定給你：「不應。」新海誠就道出深底原因：大好少年一係就好好讀書不給成人添煩，一係就為不好意思的成年人站最前排，向「不公義」的社會作抗爭。你能把去戀愛的愛、精力或金錢留下，就能好好服侍成年人。你問這套電影沒看多甚麼反體制，新海誠卻答你：少年要反體制，就係懶理成年人，去談一場戀愛。