《娼年》– 做，愛？

就算拍過《愛的放題》，三浦大輔似乎都係難搞掂《娼年》 (Call Boy)。

這唔只是每十分鐘扑一次的粉紅電影，難搞係《愛》可算在幻想世界，《娼》卻係站在現實 - 沒女觀眾會妒忌別的女人做雞做交際花，卻就多男人會眼紅有些男有得食又有得賺，總要找些理由挑剔銀幕前這個男人有何本事：松坂桃李 (森中領) 算唔算一個靚仔我不太會評論，但見其除衫胸肌都冇一件，外觀上很難叫人信服。

森中領的拍擋說他會走紅更叫人困惑 - 因為他夠平凡，所謂相比性格有問題有目的地做牛郎的，平凡意思為之單純。那毒男很多也單純吧，他們為求一扑都唔會揀飲擇食，理得你係人地老婆還是要識讀柏拉圖再睇你小便。森的無居心面孔，其實係得食機會太多，食到夠膽講出做愛係厭煩的儀式，感到女人有夠無聊才擺得出來。總之都係靚仔大哂，且無如《鴨王》一定要做王的鬥心，男觀眾一定無癮。

你問唔係睇松板哂命，或女人在表演慾望，那拍《娼年》的意義在那？或者在問為何做愛叫做愛？唔直接講「我想同你性交」？「做愛」一詞係人類可笑的反映：有些人口說性和愛可謂兩回事，但仍不用性交代做愛 – 森的女同學，因為喜歡他而失望透他去做牛郎，戀母的森為確定對御堂静香（真飛聖）的愛意而想和她做 – 無論你怎裝豁達，你都係解不了因愛而做或因做而愛。

就係你唔想被指背叛別人而已，若要講得出愛同性兩樣野，要睇你做唔做得出一個真小人。但既然講扑野都會嫌粗俗，睇怕人類都只能做偽君子。