《毒。誡》 - 有一種戒不甩的癮叫大佬癮

或者陳慎芝的故事，不一定要劉國昌才能拍。

《毒。誡》 (Dealer Healer) 裡慈雲山十三太保食霸王餐，不知好歹的可柔叫住陳華埋單，陳華反向可柔討多兩個半，說共欠十蚊好記數，可柔罵陳華正茅躉華，兩人由此生情愫。這是否似曾相識？就係《阿飛正傳》，張國榮也如此耍無賴去追張曼玉 - 男人不壞女人不愛，這叫人吹漲的真理，似都係王家衛去講才合情合理。只係這故事主題明顯不在愛情，故此唯有交回給劉國昌。

選劉國昌主因，大概係故事背景：六七十年代的東九龍地下社會黑白兩道，都係要交給拍過《童黨》和《五億探長雷洛傳》的才會安心。本來劉係不叫人失望，電影場景道具幾無破綻，一幕破爛的廁所像真度叫人讚嘆。只係後部講去了日本，畫蛇添竹拍下現代福崗的市景。最大問題係技術，全用高清鏡頭，沒有以前《童黨》或《無人駕駛》時用菲林的深色，縱使符合於那時的服飾、或市政局的標記，但一切都看得很模型、很造作。

其實陳慎芝的生平要點是甚麼？若然係藉其帶六七十年代東九龍江湖的風風雨雨，劉國昌算係交足功課。只係陳在江湖只佔一半，另一半則係戒毒後之事業，這兩半之間「戒毒」才是最關鍵的轉捩點，既然喪父時仍忍不住在靈堂吸毒的人，竟會忍受艱辛的戒毒路程？不外乎都係深感毒品禍害決定要擺脫操控，但一個出獄後聽到心愛的人嫁給別人，像鬆一口氣後又在丁憂時追龍，怎相信係毒品奪走他愛的人？聽到一個老道友講因吸毒導致家破人亡，但他自己都本身窮人，靠販毒起家，又怎會因聽一個故而會大徹大悟？顯然鋪排上竟忘了要考慮說服力。

有一幕一閃即過卻很為重要 - 教堂內譚耀文扮的戒毒所所長向陳厲聲說：「成日同我爭？坐啦！起身啦大佬！」這或才是貫徹整套戲的要點：陳華戒到毒癮，但有種癮卻戒不甩，叫大佬癮。十三太保時他已做大佬，到戒毒後，仍一面在江湖上做調停，戒毒所裡的院童寧尊敬他也不尊重正式的所長，他亦因此死拉貓仔去戒毒，說：「係我帶你去吸毒我就要帶返正你。」大佬文化雖叫男人會認識從而承擔責任，卻也會造成男人的專橫：陳華的落力，令無所發揮的戒毒所所長及哈雷弟弟相當無癮。能否令男人在責任和兼顧他人發揮間取一個平衡？最後陳華一朝得意到，竟向警校學員訓話，明顯就對此沒有反思的空間。

當然，你或可說這是劉國昌令電影更有舊時代氣息的方法，畢竟大佬係讓男人藉以自大的舊物。