《S風暴》 - 好得閒先好去睇的戲

天馬電影睇來又搞出套「陰陽路」似的東西，林德祿還真唔知有乜本事，上次《Z風暴》又唔係叫好叫坐，都給佢可以再搞一套《S風暴》 (S Storm)。英文A-Z廿六字母，逐個字母搞還真係搞到廿六套乜風暴。只要古天樂未玩完，ICAC未玩完。

                     

但始終都係o個個問題：ICAC係無炮，所以文戲係偏重。但文戲要點搞？ICAC做野手段？就正如張智霖搵古天樂協助調查，古天樂不停repeat：「ICAC查案不便透露。」馬會做野方法？又如古天樂去搵林保怡，林都不停回：「唔知呢？」咁你話個故仔重有咩睇？

支撐住套電影，就係搵一大堆人馬，各自表演或互相交手：蔡少芬係最多餘，本來有古天樂她就可省掉。盛君或者唔想做花瓶，中段無厘頭突然好打。周渝民真係只來耍帥兼同陳靜交心下，陳靜好遺憾今次又做到時而煩膠。張智霖反而有點驚喜：古天樂的ICAC一干人等正直正氣，本來相當悶蛋；張好賭連累家庭事業，加上其下屬都懶散，反而呈現返個警隊裡現實面目來。張在酒吧裡飲醉自責，說無論如何點都想破返一次案，又係簡單地重覆了《激戰》的中年作孽求一勝以解脫。

講到底，成套戲重點又係估下邊個係「快撈波士」：預係張松技，唔係就蔡少芬，或者就林保怡。結果就係只出過幾幕的石修，重要故事簡介早自爆出來俾你。認真係套好得閒先好去睇的戲。