《犯罪現場》 - 你想做好人，何必諗壞人

你實問我為何總要挑剔馮志強，由他第一套到這第四部你總在挑，因為缺憾總太顯然易見，我說。

就故事而言，《犯罪現場》 (A Witness out of the Blue) 似是馮執導以來最宏大：人物多，想講想問的亦多 - 心中有鬼、角色調轉、君子復仇等花多眼亂。但片長就只有一百零四分鐘，結果又返翻一直以來的想講多卻就講得唔夠多 - 許少梅 (顏卓靈) 崇拜做過英雄的窩囊警察林法樑 (張繼聰)：「你以前都唔係咁。」馮沒料到這對白更把問題直接暴露：係囉為何一個月入起碼二萬的警察竟會爭起大耳窿？話係因為搞貓場，還不如說是不懂理財太戇鳩，若真係戇鳩到咁其實佢係套戲度有乜意思？

你話丁喜悅 / Joy (宣萱) 也類同於林法樑，一場警匪大鬥法中似係多撚餘的支節，但她就勾出汪新元 (古天樂) 的善心，亦勾劃出主旨：馮志強係相信人性本善，正如真兇原本目的都係討回公道，淪為黑警的也會怪責同伴或自責傷及無辜或伙伴，就係窮凶極惡的也會顧念兄弟，並最後藉行善去心安理得 - 歸納就係簡單一句：我想做好人。

這句你一定聽得多 -《無間道》裡劉華講既，這套始終只係兩人互相較勁。不講那麼遠，講近的《小丑》更只係一個人怎樣被迫上梁山去到惡 - 經典從來都是簡單。林法樑最後說《犯罪現場》就在腦袋，馮志強還真會自嘲 - 明明主題簡單，偏偏諗得太多，腦海太過貪心還真會搞壞很多東西，人如是，電影也如是。