《若問世界誰無傷》- 其實又係關你蛋治

 

尹佳恩的《若問世界誰無傷》(The World Of Love)，又係叫話劇情震撼嚴防劇透云云，早幾年小弟若講下去該會被追殺，今時今日大家該想到這只廣告手段而唔關乎国家安全。況且睇得戲多，其實都猜到在說甚麼。 

 

主角李主仁（徐粹彬）男仔頭咁周圍打成一片嘻嘻哈哈，旨在唔提起往日被性侵傷痕。被性侵後沒去悲春秋的女人本來唔係稀有動物：《列女本色》（Elle）裡伊沙貝雨蓓一開場就被姦，之後她卻只當無厘頭被打左鑊咁。 

 

主仁唔係沒哭過崩潰過，被揭開往事後她在只有母親兼洗著的車內大喊大鬧 – 我哭不哭關你蛋治都唔係第一日論：《漫長的藉口》都問係咪我死老婆卻沒喊濕兩包紙巾就要被指係不道德的丈夫？ 

 

旁人比受害者哭得更利害或奇怪你為何當沒回事，一係如《嘉年華》咁把你的視為我的，然後怪你把貞操作價太低；一係就懷疑你扮受害者另有企圖，主仁師姐美都 (高旻示飾) 在法庭上被律師質：「為甚麼在被侵犯之後，隔天還可以快樂地在比賽上接受獎牌？」今日觀眾未必覺律師太無情，因大家都記得某女運動員一邊自爆被教練性侵，另一邊卻被掘出她口說避開教練之時卻笑住拿起獎牌痴埋他的照片 – 這世道你也沒權別人起防人之心。 

 

相對《漫長》，主仁起碼勇於窒話：「邊個話遭性侵一定係永不磨滅的傷口？」就係窒我的事關你蛋治，你若真心為我好就不要在我面前講起就好，畢竟你只係用關心來包裝你的八卦。亦所以我這文標題又如《漫長》用上蛋治，只因本來都這麼老土你又豈好意思話我土老。