《惠子的凝視》- 還是點叫你凝視岸井雪乃？

 

突然覺得三宅唱的《惠子的凝視》(Small, Slow But Steady) 很難評：當然唔會話難睇，但又唔想人云亦云地附和話好睇，話係平平無奇 - 大家都咁認為我又講來做乜？  

膚淺論岸井雪乃會否引你入場其實更難定：她和漂亮係扯唔上關係，但放在拳擊故事卻似恰到好處 – 換如濱邊美波就肯定弄巧反拙，只因我都不敢直視她被打至破相，但換作岸井被打到口腫臉脹，唔好意思我反覺得沒啥大不了，儘管她樣貌係唔討打，還有種柔弱感。 

  

鏡頭多近鏡捕捉岸井飾的小笠原惠子，由平常生活至練拳動作，諷刺係兩場比賽尤其係講得重要用來作結那場，卻都係遠景：惠子弟弟用CCD相機拍下對戰情景，其機沒有捕捉力以致景像濛糊；最後一戰，惠子輸了，會長等卻似睇深夜球賽重要沒買重邊隊，只覺終於完場可以返去瞓 - 贏也唔係特別光輝，但輸都唔係直插谷底。 

  

會長對惠子說打拳要有戰意，沒戰意係唔尊重對手，亦為她自己帶來危險。那戰鬥意志是甚麼？若解係要先知為何而戰，多人拿這套對比《百元之戀》–廢柴到底的一子，就係要打返場去逆轉。但惠子又真係廢到底？她只係聽障，卻有穩定工作，和家人身邊人關係亦算融洽，遭受欺負已係久遠往事–比一子甚至蘇樺偉好太多，若蘇唔跑就沒存活意義，惠子顯然沒那麼哀哉 - 唔打咪做返個普通人唔使死，正如那個贏到她的對手，咪又係個地盤工，輸贏過後都係沒啥分別。當然你會話擂台上贏起碼一剎那光輝，輸都係你人還在，總好過如《新．幪面超人》係犧牲了人竟又覺沒啥意義。

 

電影開頭還注重惠子聽障，尤其正值新冠肆虐通街戴上口罩，其亦無法讀取唇語，另其自說打架打拳時腦袋空白，話她視力很好卻沒情節突顯 - 她似就係不問世事唔在意身邊，就係打拳時多番退縮，亦因害怕而猛攻，會長所講戰意，或就勸她積極面對別人：你話三宅似借惠子論新冠橫行而人際疏離，但又似講得求其：畢竟惠子就唔係沒有家人朋友。

 

電影有一貼近原著別名：《惠子不能輸》，只係她最後還是輸，或覺得太諷刺故叫《惠子的凝視》。但終明白為何用起岸井雪乃 - 她就如惠子般，唔努力被打至口臉皆腫，係叫人家注視她的份兒都沒有。想起她有另套主演電影《終歸大海》 (やがて海へと届く)，但那套評價不佳，儘管她很賣力，無奈人家多是想睇似被借過橋而戲份少的濱邊美波。