《寒戰2》 - 趁你弱智將你軍

其實《寒戰》挑剔點去睇已可知，《赤道》更係滑稽到滑稽野畫到出腸，來到《寒戰2》 (Cold War 2) ，真係唔認真去睇還真會侮辱自己的智商。梁樂民陸劍清顯然野心太大，卻自己也掌握不了。

先講「強勢加盟」的發哥周潤發：其飾個大律師兼立法會議員簡奧偉，卻對律政司司長說：「你這是司法干預立法。」喂，律政司係行政機關的人來的；郭富城的劉傑輝同梁家輝扮之李文彬在醫院炒大鑊，簡扮o西兩人老頂般介入，還指責劉竊聽沒經過海關入境處老廉終審庭批准......你唔好問埋玉皇大帝？好地地演個大狀，卻扮到似法盲咁，陰功。

簡奧偉的角色，係咪只為入而亂入？睇返第一集，劉李兩人先因寒戰行動互有矛盾而爭權，之後係張國標的廉署介入演化成警廉衝突；第二集，也是劉的行動失敗，劉李等在立法會上被發連番質問炮轟，接而令劉李衝突再浮上水面：兩集故事都係擴大版的《三人行》，兩個內部相煎相爭，一個外來漁人或激化或延續，就此造成百多分鐘的故事。

《寒戰》主題始終係權鬥，遺憾的是，兩方都唔似鬥誰更足智多謀，反係趁誰更輕率弱智將其一軍：開頭堂堂警務處長竟被人牽著鼻子走，幾沒有後著應對，以致在地鐵站內走犯而製造被他人奪權之機；劉設局追蹤到李幕後政變集團成員，卻派大大部無人機去追車，四個身經百戰的前警員又係會留意唔到，因而釀成李幕後集團全軍盡墨。好意些想，或許梁陸看雨傘革命時，警察如何對待毆打市民，於是在電影世界裡，表面奉承，實質把警隊描為一群沉迷辦公室政治的蠢才，被觀眾恥笑一番，為市民出口氣也。

電影最後，又留下李劉鬥下去的尾巴，即又會有第三集。但第三集又怎鬥呢？記得有人講過：「唔知第三次世界大戰會係如何，只知第四次世界大戰會是木頭鬥石器。」第二集已睇到弱智鬥弱智，若還真有第三集，請梁陸拍前做多點功課，只因再下集我已有柒到唔敢睇的預感。